ब्लेडचे वार करून वारजेत महिलेचा खून

वारजे - चोरी करत असताना महिलेने प्रतिकार केला तर त्या महिलेवर ब्लेडचे वार करून त्यांची अज्ञात चोराट्यानी हत्या केली. ही घटना मंगळवारी संध्याकाळी घडली.

वारजे पोलिसांनी दिलेल्या माहितीनुसार या घटनेत सुलक्षणा सुभाष डांगे (वय - 65, रा. सुगम विश्व् कॉलनी, आकाश नगर, वारजे) या महिलेचा जागीच मृत्यू झाला. मंगळवारी सकाळी या महिलेचा जावई व नात सकाळी कामासाठी निघून गेले.

त्यानंतर सुलक्षणा या एकट्याच घरी होत्या. त्या सुगम विश्व् इमारतीत पहिल्या मजल्यावर राहत होत्या. त्या दुपारी पाणी भरण्यासाठी खाली आल्या होत्या. त्यानंतर त्यांना कोणीही पाहिले नाही. संध्याकाळी पाचच्या दरम्यान त्यांच्याच इमारती मधील एका महिलेने दार उघडे आहे म्हूणन ढोकावून बघितले तर सुलक्षणा रक्ताच्या थारोळ्यात पडल्या होत्या. याची माहिती लगेचच वारजे पोलिसांना देण्यात आली. पोलीस घटनास्थळी गेले असता त्यांनी पाहणी केली तर महिलेचा जागीच मृत्यू झाल्याचे दिसुन आले. त्यांच्या अंगावरील सोन्याचे दागिने तसेच घरातील पैसे चोरीला गेल्याचे दिसुन आले. त्यामुळे या महिलेने चोरीला प्रतिकार केला म्हणून मारले असल्याचा संशय व्यक्त होत आहे. पुढील तपास वारजे पोलीस करत आहे.