Vishrantwadi News : येरवड्यात भर वस्तीमध्ये शिरले जंगली डुक्कर; अनेक नागरिकांना घेतला चावा

विश्रांतवाडी - आज पहाटे येरवडा परिसरातील मदर तेरेसानगर, गाडीतळ भागामध्ये अचानक जंगली डुक्कर शिरल्याने भरवस्तीमधील नागरिक भयभीत झाले. ते डुक्कर वस्तीत धावत असताना अनेक नागरिकांना त्याने चावा घेतला.

ही बातमी वाऱ्यासारखी पसरली असता, परिसरातील सामाजिक कार्यकर्ते डॅनियल लांडगे व सहकाऱ्यांनी तत्काळ या जंगली डुकराला पकडण्यासाठी येरवड्यातीलच डुक्कर व्यावसायिक यांना पाचारण करण्यात आले. त्यांनी त्यांच्या पूर्ण साहित्य वापरून, जाळी वापरून या डुकराला पकडण्यासाठी प्रयत्न सुरू केले. परंतु तरीही ते जंगली जनावर लवकर ताब्यात येत नव्हते.

गल्लीबोळातून वस्तीवस्तीतून ते लक्ष्मीनगर परिसरामध्ये शिरले व तेथेही काही नागरिकांना चावा घेतला. यामुळे सबंध परिसरामध्ये भीतीचे वातावरण पसरले होते. व वेळीच त्या डुक्कर पकडणाऱ्या व्यावसायिकांनी मोठ्या अथक परिश्रमाने व शिताफिने जाळे टाकून त्या डुकरास जेरबंद केले व त्यानंतर परिसरातील नागरिकांनी सुटकेचा नि:श्वास सोडला.

वेळीच त्याला पकडल्यामुळे मोठा अनर्थ टळला, अन्यथा नागरिकांना नाहक जीवघेणा हल्ला सहन करावा लागला असता. हे जंगली डुक्कर कोठून लोकवस्तीमध्ये शिरले, याची अजिबात कोणालाही कल्पना नव्हती.