विरोधकासोबत फिरल्याच्या रागातून तरुणावर कोयत्याने वार

पुणे : विरोधकासोबत फिरत असल्याच्या रागातून टोळक्‍याने तरुणाला अडवून त्याच्यावर कोयत्याने वार केले. या घटनेत तरुण गंभीर जखमी झाला आहे. हि घटना बुधवारी रात्री आठ वाजण्याच्या सुमारास बिबवेवाडी परिसरात घडली. याप्रकरणी बिबवेवाडी पोलिसांनीस दोघांना अटक केली असून एका अल्पवयीन मुलाला ताब्यात घेतले आहे. अक्षय अभंग व आकाश गोरड अशी अटक केलेल्यांची नावे आहेत. याप्रकरणी लोकेश पगारे (वय 20, रा.अप्पर इंदिरा नगर) असे जखमी झालेल्या तरुणाचे नाव आहे. (Pune News)

त्यावरुन अटक केलेल्या आरोपींसह सात जणांविरुद्ध खुनाचा प्रयत्न केल्याप्रकरणी गुन्हा दाखल झाला आहे. पोलिसांनी दिलेल्या माहितीनुसार, फिर्यादी पगारे हा बुधवारी रात्री आठ वाजण्याच्या सुमारास त्याच्या दुचाकीवरुन व्हिआयटी रस्त्याने घरी जात होता. त्यावेळी आरोपींनी त्याची दुचाकी अडविली. त्यानंतर त्याला "तु भावेश गायकवाड सोबत का फिरतो' असे म्हणत शिवीगाळ करून लाथाबुक्‍क्‍यांनी मारहाण केली.

त्यानंतर आरोपींनी कोयत्याने फिर्यादीच्या डोक्‍यात वार केले. तसेच रस्त्याच्याकडेला पडलेले पेव्हर ब्लॉक फिर्यादीच्या तोंडवर व हातावर मारून त्यास गंभीर जखमी केले. त्यानंतर फिर्यादीच्या दुचाकीचीही तोडफोड करून आरोपींनी कोयते हातात घेत, आरडाओरडा करून परिसरात दहशत निर्माण केली. या घटनेनंतर परिसरातील नागरीकांमध्ये भितीचे वातावरण तयार झाले होते. या प्रकरणाचा तपास सहाय्यक पोलिस निरीक्षक राजेश उसगावकर करीत आहेत.