पुणे-सोलापूर महामार्गावरील थेऊर फाटा येथील अपघातात तरुणाचा जागेवरच मृत्यू

लोणी काळभोर : पुणे-सोलापूर महामार्गावरील कुंजीरवाडी (ता. हवेली) हद्दीतील थेऊर फाटा येथे झालेल्या अपघातात १८ वर्षीय तरुणाचा जागेवरच मृत्यु झाल्याची घटना बुधवारी (ता. २४) पहाटे साडेतीन वाजण्याच्या सुमारास घडली आहे. 

- पुण्याच्या बातम्या वाचण्यासाठी येथे ► क्लिक करा 

सुरज अनिल दणाने (वय १८, रा. पाषाणकर बाग, लोणी काळभोर, ता. हवेली) असे मृत्यूमुखी पडलेल्या तरुणाचे नाव आहे. 

या प्रकरणी त्यांचा मित्र विशाल मच्छिंद्र कदम (वय २१, रा. पाषाणकर बाग, लोणी काळभोर, ता. हवेली) यांनी लोणी काळभोर पोलिसांत तक्रार दिली आहे. 

लोणी काळभोर पोलिसांनी अपघात करून पळून जाणाऱ्या वाहन चालक कंटेनरचा पाठलाग करून आरोपीस अटक केल्याची माहिती लोणी काळभोर पोलिस ठाण्याचे वरिष्ठ  पोलिस निरीक्षक सुरज बंडगर यांनी दिली आहे.

इरशाद मन्सूर अली (वय- २७, रा. कुमारपाडा, ता. लक्ष्मीपुरी, जि. समलपूर, राज्य उडीसा ) असे अटक केलेल्या आरोपीचे नाव आहे. 

पोलिसांनी दिलेल्या माहितीनुसार, विशाल कदम हे थेऊर फाटा येथे अंडा भुर्जीची टपरी चालवतात. सुरज दणाने हा टपरीमध्ये मदतनीस म्हणून काम करीत असे. बुधवारी (ता. २४ ) पहाटे  साडेतीनला टपरी  बंद करायची म्हणून सर्व काम उरकून घेतले. त्यानुसार काम उरकल्यानंतर सुरज दणाने हा वॉशरूमला जाऊन येतो असे म्हणाला व नंतर आपण घरी जाऊ असे बोलला. त्यानुसार सोलापूर बाजूकडे पायी वॉशरूमकडे चालत जात असताना थेऊर फाट्यावरील चौकात सोलापूर बाजूकडून पुणे बाजूकडे येऊन थेऊर बाजूकडे जाणाऱ्या रॉग बाजूच्या दिशेने एक कंटेनर आला होता. त्याच बाजूने  सुरज दणाने हा चालत निघाला असताना कंटेनरने सुरज दणाने याला समोरासमोर ठोस देऊन अपघात केला.

दरम्यान, अपघात झाल्यानंतर थेऊर फाट्यावरील सुरक्षारक्षक यांनी आरडाओरडा करायला सुरुवात केली. त्यानुसार विशाल कदम याने समक्ष ठिकाणी जाऊन पाहणी केली असता सुरज दणाने याच्या डोक्याला गंभीर दुखापत झाली होती. त्यानुसार लोणी काळभोर पोलिसांशी संपर्क केला असता ठाणे अंमलदार सुनील शिंदे यांनी अँबुलन्सला बोलावले व अपघात करणारी गाडी कोणत्या दिशेने गेल्याची विचारपूस करुन थेऊर फाट्याकडे पळून जाणाऱ्या कंटेनर चालक इरशाद अली याला  कुंजीरमळा या ठिकाणी अडवून त्याला लोणी काळभोर पोलिस ठाण्यात घेऊन आले.

- ताज्या बातम्यांसाठी डाऊनलोड करा ई-सकाळचे ऍप

दरम्यान, सुरज दणाने याला सरकारी दवाखान्यात दाखल केले असता उपचारापूर्वीच सूरज दणाने याचा मृत्यू झाल्याची माहिती वैद्यकीय अधिकाऱ्यांनी दिली. तपास सहाय्यक पोलिस निरीक्षक संदीप कांबळे करीत आहेत.

(संपादन : सागर डी. शेलार)