Mutual Fund Investment : इक्विटी म्युच्युअल फंडांत मार्चमध्ये घट; दुसऱ्या महिन्यात १९,००० कोटींची गुंतवणूक

मुंबई : इक्विटी म्युच्युअल फंडांच्या स्मॉल कॅप फंडांमधून मार्च महिन्यात, गेल्या अडीच वर्षांमध्ये प्रथमच गुंतवणूकदारांनी पैसे काढून घेतले असून, मिड कॅप फंडांमधील गुंतवणूकही घटली असल्याचे असोसिएशन ऑफ म्युच्युअल फंड्स इन इंडियाच्या (अॅम्फी) अहवालात म्हटले आहे.

म्युच्यअल फंडातील गुंतवणुकीसाठी सिस्टीमॅटिक इन्व्हेस्टमेंट प्लॅन्स अर्थात ‘एसआयपी’लाच पहिली पंसती असल्याचेही या अहवालावरून स्पष्ट झाले. सलग दुसऱ्या महिन्यात ‘एसआयपी’द्वारे १९,००० कोटी रुपयांची गुंतवणूक झाली आहे.

‘एसआयपी’तून फेब्रुवारीमध्ये १९,१८७ कोटी रुपयांची गुंतवणूक झाली होती. मार्च महिन्यात ती १९,२७१ कोटी रुपये झाली आहे. म्युच्युअल फंडांमध्ये मार्चमध्ये एकूण २२,६३३ कोटी रुपयांची गुंतवणूक झाली असून, ती फेब्रुवारीमध्ये २६,८६६ कोटी रुपये होती.

म्युच्युअल फंडांच्या व्यवस्थापनाखालील मालमत्तेत मार्चमध्ये दोन टक्क्यांनी घसरण झाली असून, ती ५३.१२ लाख कोटी रुपये आहे. मार्चमध्ये १९ नव्या योजना दाखल झाल्या, त्यात ३,८२७ कोटी रुपयांची गुंतवणूक झाली.

इक्विटी म्युच्युअल फंडांची स्मॉल कॅप श्रेणी वगळता अन्य सर्व श्रेणींमध्ये गुंतवणूक झाली. मार्च महिन्यात इक्विटी म्युच्युअल फंडांत १.८४ लाख कोटी रुपयांची भर पडली. स्मॉल कॅप फंडातून मार्चमध्ये ९४ कोटी रुपयांचा निधी बाहेर पडला.

याआधी सप्टेंबर २०२१ मध्ये स्मॉल कॅप फंडांतून २४९ कोटी रुपयांचा निधी काढून घेण्यात आला होता. फेब्रुवारीमध्ये स्मॉल कॅप म्युच्युअल फंडांमध्ये २,९२२.४५ कोटी रुपयांचा ओघ आला होता. गेल्या महिन्यात रिझर्व्ह बँक व ‘सेबी’ने मिड कॅप व स्मॉल कॅप कंपन्यांच्या शेअरच्या वाढलेल्या मूल्याकंनाबाबत चिंता व्यक्त केली होती. त्यामुळे स्मॉल कॅप कंपन्यांच्या शेअरमध्ये घसरण झाली, परिणामी गुंतवणूकदारांनी निधी काढून घेण्यावर भर दिला, असे ‘अॅम्फी’ने म्हटले आहे.

गुंतवणुकीची आकडेवारी

• लार्ज कॅप फंडांत २,१२८ कोटी, १३१ टक्क्यांनी वाढ

• मिड कॅप फंडात १,८२७ कोटी रुपये गुंतवणूक

• लार्ज अँड मिड कॅपमध्ये ३,२१५ कोटी रुपयांचा ओघ

• थीमॅटिक फंडामध्ये सर्वाधिक ७,९१७ कोटी रुपयांचा निधी

• डेट फंडांमधून सर्वाधिक १.९८ लाख कोटी गुंतवणूक बाहेर

• लिक्विड फंडांमधून विक्रमी १.५७ लाख कोटींचा निधी काढला

• हायब्रिड फंडात ६९ टक्के घट, केवळ ५५८३ कोटी रुपयांचा ओघ

• ‘ईटीएफ’मध्ये १०,५५९ कोटी, ‘गोल्ड ईटीएफ’मध्ये ३७३ कोटी वाढ