बँकांकडून उद्योगांच्या कर्जात वाढ; वैयक्तिक कर्जवितरणाचे प्रमाण कमी, ‘केअरएज रेटिंग्ज’चा अहवाल

मुंबई : देशातील बँकिंग क्षेत्राने मार्च महिन्यात कर्जवितरणात चांगली वाढ नोंदविली असून, उद्योगांना कर्जपुरवठ्याचे प्रमाण वाढले आहे. वैयक्तिक कर्जवितरणाचे प्रमाण मात्र लक्षणीयरीत्या कमी झाले आहे. ‘केअरएज रेटिंग्ज’ने बँकिंग क्षेत्रातील कर्ज वितरणाबाबत नुकत्याच जाहीर केलेल्या अहवालात ही माहिती देण्यात आली आहे.

या अहवालानुसार, गेल्या वर्षीच्या तुलनेत यंदा मार्चमध्ये बँकांचे एकूण कर्ज वितरण २०.२ टक्क्यांनी वाढले आहे. या वाढीसाठी एचडीएफसी बँक आणि एचडीएफसी यांचे विलीनीकरण कारणीभूत ठरले आहे. एचडीएफसीचे विलीनीकरण गृहित न धरता कर्ज वितरणातील वाढ १६.३ टक्के आहे. गेल्या वर्षी मार्च महिन्यात ती १५ टक्के होती.

वैयक्तिक कर्जांमध्ये गृहकर्जाचे वितरण मार्चमध्ये ३६.९ टक्के वाढले आहे, तर वाहनकर्जाच्या वितरणातील वाढ कमी होऊन १७.३ टक्क्यांवर आली आहे. व्यावसायिक कर्जांमध्ये मार्च महिन्यात १६.३ टक्के वाढ झाली असून, त्यात उद्योग आणि सेवांचा समावेश आहे. गेल्या वर्षी मार्च महिन्यात ही वाढ १२.५ टक्के होती.

एचडीएफसीचे विलीनीकरण गृहित न धरताही यंदा मार्चमधील वाढ १४.६ टक्के असून, ती गेल्या वर्षीच्या मार्चच्या तुलनेत जास्त आहे. गेल्या वर्षीच्या तुलनेत यंदा मार्चमध्ये सेवाक्षेत्रासाठीच्या कर्ज वितरणात २२.९ टक्के वाढ नोंदविण्यात आली आहे. त्या खालोखाल व्यापार, बांधकाम आणि वित्तीय संस्थांचा समावेश आहे.