Jet Airways : जेट एअरवेजची मालकी ‘जालान कॅलरॉक’कडे; ‘एनसीएलएटी’च्या खंडपीठाचा निर्णय

नवी दिल्ली : दिवाळखोरी अपीलीय न्यायाधिकरणाने (एनसीएलएटी) जेट एअरवेजची मालकी ‘जालान कॅलरॉक कन्सोर्टियम’कडे हस्तांतरित करण्यास मान्यता दिली आहे. ‘एनसीएलएटी’च्या खंडपीठाने जेट एअरवेजच्या देखरेख समितीला ९० दिवसांच्या आत हे मालकी हस्तांतरण पूर्ण करण्याचे आदेश दिले आहेत.

त्याशिवाय, जेट एअरवेजच्या कर्जदारांना या कन्सोर्टियमने दिलेले १५० कोटी रुपये बँक हमी म्हणून समायोजित करण्याचेही आदेश दिले आहेत. जेट एअरवेज आणि जालान कॅलरॉक कन्सोर्टियमला (जेकेसी) कर्ज देणाऱ्या बँका दिवाळखोरीत निघालेल्या जेट एअरवेजचे हस्तांतर होण्यासाठी एक वर्षाहून अधिक काळ कायदेशीर संघर्ष करत आहेत.

यापूर्वी, कर्जदारांनी सर्वोच्च न्यायालयात धाव घेतली होती. मात्र, सर्वोच्च न्यायालयाने या प्रकरणात हस्तक्षेप करण्यास नकार दिला आणि राष्ट्रीय कंपनी कायदा अपील न्यायाधिकरणाला या प्रकरणावर निर्णय देण्याचे आदेश दिले.