RBI Action : महाराष्ट्रातील पाच को-ऑपरेटिव्ह बँकांना आरबीआयचा दणका! लाखोंचा दंड, काय आहे कारण?

भारतीय रिझर्व्ह बँकेने महाराष्ट्रातील पाच को-ऑपरेटिव्ह बँकांवर मोठी कारवाई केली आहे. नियमांकडे दुर्लक्ष केल्यामुळे या बँकांना लाखोंचा दंड ठोठावण्यात आला आहे. यामध्ये पुणे, सातारा आणि मुंबईमधील बँकांचा समावेश आहे.

आरबीआयने कारवाई केलेल्या बँकांमध्ये इंदापुर को-ऑपरेटिव्ह बँक लिमिटेड, दि पाटण अर्बन को-ऑपरेटिव्ह बँक लिमिटेड, जनकल्याण सहकारी बँक लिमिटेड, पुणे मर्चंट्स को-ऑपरेटिव्ह बँक लिमिटेड आणि पुणे नगर निगम सर्व्हेंट्स को-ऑपरेटिव्ह अर्बन बँक लिमिटेड या पाच बँकांचा समावेश आहे. या सर्व बँकांवर विविध कारणांमुळे कारवाई करण्यात आली आहे. एबीपीने याबाबतचं वृत्त प्रसिद्ध केलं आहे.

कशामुळे झाली कारवाई?

इंदापूर को-ऑपरेटिव्ह बँकेला आरबीआयने पाच लाखांचा दंड ठोठावला आहे. डिपॉझिट खाते आणि मिनिमम बॅलन्स मेन्टेन करण्याच्या नियमांकडे दुर्लक्ष केल्यामुळे ही कारवाई करण्यात आली. मुंबईतील जनकल्याण सहकारी बँकेने क्रेडिट सूचनेच्या नियमांचं पालन केलं नसल्यामुळे या बँकेला देखील पाच लाखांचा दंड ठोठावण्यात आला आहे.

साताऱ्यातील पाटण अर्बन को-ऑपरेटिव्ह बँकेने बँकिंग रेग्युलेशन अ‍ॅक्ट 1949 च्या नियमांकडे दुर्लक्ष केल्यामुळे, या बँकेला दोन लाखांचा दंड ठोठावण्यात आला आहे. तर पुणे मर्चंट्स आणि पुणे नगर निगम सर्व्हेंट्स को-ऑपरेटिव्ह बँकांना प्रत्येकी एक लाखांचा दंड ठोठावण्यात आला आहे.

ग्राहकांवर काय होणार परिणाम?

आरबीआयने आपल्या आदेशात हे स्पष्ट केलं आहे, की या बँकांच्या कामकाजात ढवळाढवळ करण्याचा आपला उद्देश नाही. केवळ नियमांकडे दुर्लक्ष केल्यामुळे या बँकांवर कारवाई करण्यात आली आहे. याचा बँकेच्या इतर व्यवहारांवर किंवा ग्राहकांवर कोणताही परिणाम होणार नाही.