Kamal Pardeshi : आंतरराष्ट्रीय मसाला क्वीन कमल परदेशी यांचे निधन

खुटबाव : खुटबाव (ता.दौंड) येथील आंतरराष्ट्रीय मसाला क्वीन म्हणून परिचित असणाऱ्या अंबिका महिला सहकारी औद्योगिक संस्थेच्या अध्यक्षा कमल शंकर परदेशी (वय ६३) यांचे निधन झाले. त्या गेल्या काही दिवसांपासून कर्करोगाशी झुंजत होत्या.

(ambika mahila co industry president kamal shankar pardeshi passed away)

पुण्याच्या ससून रुग्णालयात त्यांनी मंगळवारी (ता.२) दुपारी एक वाजता अखेरचा श्वास घेतला. रात्रीच्या सुमारास खुटबाव येथे त्यांच्यावर अंत्यसंस्कार करण्यात आले. त्यांच्या पाठीमागे पती, तीन विवाहित मुली, नातवंडे असा परिवार आहे.

शेतमजूर महिला ते उद्योजिका असा थक्क करणारा त्यांचा प्रवास आहे. खुटबाव व भांडगाव परिसरातील खुरपणी करणाऱ्या १० महिलांची एकजूट करून त्यांनी भांडगाव (ता.दौंड) येथे श्री अंबिका महिला सहकारी औद्योगिक संस्थेचे उभारणी केली.

त्यानंतर व्यवसाय वाढल्याने घरातील २०० महिलांना अंबिका महिला बचत गट व‌ अंबिका महिला औद्योगिक संस्थेच्या माध्यमातून रोजगार मिळवून दिला. महिलांना रोजगार मिळण्यासाठी सुरुवातीस स्वतःच्या घरी मसाले तयार करत त्यांनी बँकेच्या माध्यमातून कर्ज उभारून अंबिका औद्योगिक संस्थेची स्थापना केली व दर्जेदार मसाला उत्पादनात सुरुवात झाली.

मसाले व्यवसाय सातासमुद्रापार नेण्यामध्ये त्या यशस्वी झाल्या. आज अंबिका नावाने ब्रँडने प्रचलित मसाला जगभरात नऊ देशामध्ये विकला जात आहे. त्यांचे अंबिका मसाले नावाने ३२ फ्लेवर मार्केटमध्ये विकले जात आहे. त्यांच्या कार्याची दखल घेत नाबार्डने त्यांना जागतिक आर्थिक शिखर परिषदेतर्फे सन्मानित केले.

माजी राष्ट्रपती प्रतिभा पाटील यांच्या हस्ते रणरागिणी पुरस्कार त्यांना मिळाला. त्यांना २०२१ मध्ये आयसीएसआरचा पुरस्कार मिळाला होता. याशिवाय सावित्री सन्मान असोशिएशन व सेवाश्री डॉ. बाबासाहेब आंबेडकर पुरस्कार अशा अनेक त्यांना सन्मानित करण्यात आले. त्यांच्या निधनाने दौंड तालुक्यात शोककळा पसरली आहे.