Berger Paints : बर्जर पेंट्स (शुक्रवारचा बंद भाव ः रु. ५५४)

बर्जर पेंट्स ही भारतातील दुसरी सर्वांत मोठी पेंट कंपनी आहे. धोरणात्मक दृष्टीने केलेली उत्पादनक्षमतेतील वाढ, नावीन्यपूर्ण उत्पादने आणि प्रभावी विपणन खर्च या त्रिसूत्रीमुळे या बाजारपेठेतील मोठा हिस्सा काबीज करत, ही कंपनी देशांतर्गत पेंट उद्योगात व्यवसायवृद्धी करत आहे.

सध्या जाहीर झालेल्या तिमाही निकालानुसार, कंपनीचा महसूल २,८८२ कोटी रुपये झाला आहे, तर निव्वळ नफा सुमारे ३०० कोटी रुपयांवर पोचला आहे. कंपनीचा तिमाही निव्वळ नफा एका वर्षापूर्वीच्या याच कालावधीच्या तुलनेत सुमारे ४९ टक्क्यांनी वाढला आहे. मागील तीन तिमाही निकालांनुसार, एकूण निव्वळ नफा सुमारे ९४७ कोटी रुपयांवर पोचला आहे.

छोट्या शहरांत मोठा व्यवसाय

बर्जर पेंट्सचे व्यवस्थापकीय संचालक आणि मुख्य कार्यकारी अधिकारी अभिजित रॉय यांच्या म्हणण्यानुसार, टियर दोन आणि टियर तीन शहरांमधील व्यवसायवृद्धीचा दर टियर एक शहरांपेक्षा जास्त आहे. कंपनीने वॉटरप्रूफिंग; तसेच बांधकाम रसायनांच्या विभागातदेखील आक्रमक वाढ सुरू ठेवली आहे.

व्यवसायाच्या वाढीसाठी कंपनीने सीलंट आणि छतावरील वॉटरप्रूफिंग श्रेणीमध्ये नवी उत्पादने सादर केली आहेत. कंपनीने या तिमाहीत सुमारे २३०० हून अधिक रिटेल टच पॉइंट जोडले असून, डिजिटल सेवेवरही भर दिला आहे.

याचा फायदा व्यवसायवाढीला होत आहे. व्यवसायवृद्धीकरिता कंपनीकडे मागणी पूर्ण करण्यासाठी देशभरातील उत्पादन सुविधांसह ६० हजारांपेक्षा अधिक डीलर आणि किरकोळ विक्रेत्यांचे सक्षम वितरण जाळे आहे. विक्रीवाढीसाठी (कोको) स्वमालकीची आणि कंपनी-संचलित स्टोअरदेखील कार्यरत आहेत.

कर्जाचे प्रमाण कमी ठेवत गुंतविलेल्या भांडवलावर प्रति वर्ष १५ टक्क्यांपेक्षा जास्त परतावा मिळवत कंपनी व्यवसायवृद्धी करत आहे. दीर्घावधीतील व्यवसायवृद्धीची शक्यता आणि क्षमता; तसेच कंपनीच्या कार्यक्षेत्रातील धोका लक्षात घेऊन दीर्घावधीच्या दृष्टीने या शेअरमध्ये गुंतवणूक करण्याचा गुंतवणूकदारांनी जरूर विचार करावा.

(या लेखातील माहिती अभ्यासाच्या दृष्टिकोनातून दिली गेली आहे. प्रत्यक्ष व्यवहार करताना जोखीम ओळखून वैयक्तिक गुंतवणूक सल्लागाराचा सल्ला घेणे आवश्यक आहे.)