अयोध्येतील विकासाचे नवे पर्व

- प्रमोद मुजुमदार

अयोध्या येथे मर्यादापुरुषोत्तम प्रभू श्रीरामाच्या बालक रामललाच्या मूर्तीची गेल्यावर्षी अर्थात पौष शुक्ल द्वादशी (२२ जानेवारी २०२४) रोजी विधिवत प्राणप्रतिष्ठा झाली. त्या सोहळ्याला तिथीनुसार आज एक वर्ष पूर्ण होत आहे. या निमित्ताने अयोध्या येथे झालेला विकास लक्षणीय आहे.

न्यायालयाच्या निकालाप्रमाणे नरेंद्र मोदी सरकारने अयोध्येमध्ये मंदिर बांधण्यासाठी एका न्यासाची स्थापना केली. त्याद्वारे मंदिर निर्माणाचे काम अतिशय वेगाने सुरू झाले. गेल्या २२ जानेवारीला रामलला मूर्तीची प्राणप्रतिष्ठा विधिवत झाली. या मंदिराच्या परकोटा परिसरामध्ये एकूण १८ मंदिरांच्या निर्माणाची कामे सुरू आहेत. यामध्ये दशावतार, शेषावतार, निषादराज, शबरी, अहल्या, संत तुलसीदास, शिव, माँ दुर्गा, अन्नपूर्णा, श्रीगणेश, हनुमान, आदींचा समावेश आहे.