पुरवठा विभागाकडे २५ हजार अर्ज प्रलंबित

सातारा - रेशनकार्ड आधारकार्डशी लिंकअप करण्याचे काम युद्धपातळीवर सुरू आहे. पण, सर्व्हर डाउन असल्याने गेल्या तीन- चार महिन्यांपासून ही कामे खोळंबली आहेत. जिल्ह्यातील विविध कामांचे २५ हजार अर्ज पुरवठा विभागाकडे पडून राहिले आहेत. केंद्र सरकार व राज्य सरकारचा सर्व्हर स्वतंत्र असल्याने त्यामध्ये डाटा अपलोड करताना काही तरी चुकीचा प्रकार झाल्याने याचा पुरवठा विभागाच्या कर्मचाऱ्यांसह रेशनकार्डधारकांना त्रास सहन करावा लागत आहे.

सध्या आधारकार्ड व रेशनकार्ड लिंकअप झालेल्यांनाच धान्य दिले जात आहे. नावे कमी करणे, नाव बदलणे, मृतांची नावे कमी करणे आदी कामेही या सर्व्हरच्या माध्यमातून केली जातात. पण, गेल्या तीन-चार महिन्यांपासून मंत्रालयातील पुरवठा विभागाचा सर्व्हर बंद असल्याने आधार लिंकअपची कामे रखडली आहेत. जिल्ह्यातील तब्बल २५ हजार विविध अर्ज पुरवठा विभागाकडे प्रलंबित आहेत. त्यामुळे ज्यांचे लिंकअप झालेले नाही, अशा रेशनकार्डधारकांना धान्य मिळत नाही. त्यामुळे पुरवठा विभागातील कर्मचाऱ्यांना नागरिकांच्या रोषाला सामोरे जावे लागत आहे.

सध्या आधारकार्ड रेशनकार्डशी लिंकअप करताना केंद्राचा सर्व्हर व राज्याचा सर्व्हर अशी डेटाची देवाण-घेवाण होते. त्यातूनच लिंकअपची प्रक्रिया होते. पण, गेल्या तीन-चार महिन्यांपासून मंत्रालयातील सर्व्हर बंद असल्याने जिल्ह्यातील लिंकअपसह विविध कामे रखडली आहेत. सध्या जिल्ह्यातील २५ हजार नागरिकांचे अर्ज प्रलंबित आहेत.

गेल्या तीन- चार महिन्यांपासून सर्व्हर डाउन असल्याने पुरवठा विभागाची सर्व ऑनलाइन कामे रखडली होती. पण, गेल्या दोन दिवसांपासून सर्व्हर पुन्हा चालू झाला आहे. तसेच त्याचे स्पीडही चांगले मिळत असल्याने प्रलंबित कामे लवकरच मार्गी लागतील.

- स्नेहा देवकाते, जिल्हा पुरवठा अधिकारी.