Sharad Pawar : शरद पवारांच्या केसाला जरी धक्का लागला, तर..; जीवे मारण्याच्या धमकीविरोधात राष्ट्रवादी आक्रमक

सातारा : राष्ट्रवादीचे अध्यक्ष खासदार शरद पवार (Sharad Pawar) यांना जीवे मारण्याची धमकी देणाऱ्या व्यक्तीवर गुन्हा दाखल करून तत्काळ अटक करावे, शरद पवार यांना झेड प्लस सुरक्षा द्यावी.

तसेच राणे, मुनगंटीवार, पडळकर यांच्यावरही गुन्हा दाखल करावा, अशी मागणी राष्ट्रवादी महिला आघाडीने (NCP Mahila Aghadi) पोलिस अधीक्षकांकडे केली आहे. पवार यांच्या केसाला जरी धक्का लागला, तर हे सरकार त्याला जबाबदार असेल, अशा इशारा महिलांनी दिला आहे.

याबाबतचे निवेदन अतिरिक्त पोलिस अधीक्षक बापू बांगर यांना दिले आहे. राष्ट्रवादीच्या महिला जिल्हाध्यक्षा संजना जगदाळे यांच्या नेतृत्वाखालील पदाधिकाऱ्यांनी हे निवेदन दिले. या वेळी महिला आघाडी प्रदेश उपाध्यक्षा समिंद्रा जाधव, जिल्हा संपर्क प्रमुख कुसुमताई भोसले, नलिनी जाधव, वैशाली सुतार, सातारा तालुकाध्यक्षा मेघा नलावडे, संगीता ढाणे, डॉ. सुनीता शिंदे, पूजा काळे, स्मिता देशमुख, शुभांगी कांबळे आदी महिला उपस्थित होत्या.

निवेदनात महिला आघाडीने म्हटले, की खासदार शरद पवार यांना ट्विटरवरून तुमचा दाभोलकर करून टाकू, अशी धमकी देण्यात आली आहे. या व्यक्तीचा शोध घेऊन त्यावर देशद्रोहाचा गुन्हा दाखल करावा, अशी मागणी करण्यात आली आहे, तसेच नीलेश राणे (Nilesh Rane), सुधीर मुनगंटीवार, गोपीचंद पडळकर (Gopichand Padalkar) हे सतत अरेरावीची भाषा करतात.

शिंदे, फडणवीस सरकारमधील मंत्री व आमदार अशा धमक्या देत असतील, तर या सरकारकडून काय अपेक्षा ठेवायची. शरद पवार यांना झेड प्लस सुरक्षा द्यावी. राणे, मुनगंटीवार, पडळकर यांच्यावर गुन्हा दाखल करावा. श्री. पवार यांच्या केसाला जरी धक्क लागला, तर हे सरकार त्याला जबाबदार असेल, अशा इशारा या महिलांनी दिला आहे.