जिल्हाधिकारी कार्यालयासमोरच वाजला 'बॅंड'! वाचा, नेमका काय आहे प्रकार

सातारा : कोरोनाच्या संसर्गामुळे असंघटित कामगारांवर उपासमारीची वेळ आली आहे. लग्न व इतर शुभकार्यात बॅंड व बेंजो वाजविण्यास मनाई केलेली आहे. त्यांच्याकडे उत्पन्नाचे इतर कोणतेही साधन नसल्याने सध्या लॉकडाउन शिथिल केलेले असल्याने सुरक्षित अंतराचे पालन करत विविध लग्नकार्यात किमान दहा कलाकारांना बॅंड, बेंजो वाजविण्यास परवानगी मिळावी, या मागणीसाठी बॅंड, बेंजो चालक व कलाकार संघटनेने आज (ता. ७) जिल्हाधिकारी कार्यालयासमोर बॅंड वाजवा आंदोलन केले. 

या संघटनेचे प्रदेशाध्यक्ष अशोकराव जाधव व जिल्हाध्यक्ष सचिन वायदंडे यांच्या नेतृत्वाखाली आज जिल्हाधिकारी कार्यालयासमोर हे आंदोलन झाले. या वेळी जिल्हाधिकाऱ्यांना दिलेल्या निवेदनात संघटनेने म्हटले, की प्रत्येक जिल्ह्यात 250 ते 300 बॅंड, बेंजो पथके कार्यरत आहेत. प्रत्येक पथकात 25 ते 30 कलाकार काम करतात. त्यानुसार प्रत्येक जिल्ह्यात सहा ते सात हजार कुटुंबे या व्यवसायावर अवलंबून आहेत. कोरोनाच्या काळात शासनाने बांधकाम क्षेत्रातील असंघटित कामगारांना आर्थिक मदत दिलेली आहे. त्याला विरोध नाही; पण असंघटित कलाकारांना दुसरे कोणतेही उत्पन्नाचे साधन नाही. त्यामुळे या कलाकारांवर उपासमारीची वेळ आली आहे. 

कऱ्हाडच्या बेफिकीर 300 नागरिकांना पोलिसांचा झटका! 

त्यामुळे शासनाने बॅंड व बेंजोवरील बंदी उठवून किमान दहा कलाकारांच्या उपस्थित सुरक्षित अंतराच्या माध्यमातून वाद्य वाजविण्यास परवानी द्यावी. या कलाकारांना असंघटित कामगारांप्रमाणे आर्थिक मदत द्यावी, बॅंड व बेंजो चालकांना बॅंकेची कर्ज हप्ते भागविण्यासाठी व पार्टीच्या देखभालीसाठी या अडचणीच्या काळात किमान पाच लाख रुपये बिनव्याजी मदत मिळावी, या लोककलेला मान्यता मिळावी आदी मागण्या करण्यात आल्या आहेत. या वेळी संघटनेचे पदाधिकारी व कलाकार आंदोलनात सहभागी झाले होते. 

संपादन : बाळकृष्ण मधाळे