Satara News : चोरे आयुर्वेद दवाखान्याची राज्यस्तरावर निवड; सातारा जिल्ह्यातील पहिलाच दवाखाना

कऱ्हाड : राष्ट्रीय आयुष अभियानाच्या आयुष सेवा उपक्रम अंतर्गत आयुष ग्राम योजनेमध्ये जिल्ह्यातील १७ आयुर्वेद दवाखान्यांपैकी चोरे येथील दवाखान्याची राज्यस्तरावर निवड करण्यात आली आहे. या योजनेअंतर्गत राज्यातून केवळ नऊ दवाखान्यांची निवड झाली. त्यात चोरेतील दवाखान्याचा समावेश आहे.

राष्ट्रीय आयुष अभियानाच्या आयुष सेवा उपक्रम अंतर्गत चोरे येथे आयुर्वेदीक दवाखाना सुरु करण्यात आला आहे. नुकतेच या दवाखान्याचे एनएबीएच नामांकानासाठीही नुल्यमापन करण्यात आले आहेत. या आयुष ग्राम उपक्रमात निवड होण्यासाठी सर्व अधिकारी, पदाधिकारी, कर्मचारी व ग्रामस्थांनी विशेष योगदान दिले आहे.

जिल्हा आरोग्य अधिकारी डॉ. महेश खलिपे, तालुका आरोग्य अधिकारी डॉ. सुनील चव्हाण, जिल्हा आयुष अधिकारी डॉ. मिथुन पवार, इंदोली प्राथमिक आरोग्य केंद्राचे वैद्यकीय अधिकारी डॉ. कृशल जाधव, डॉ. स्वाती यादव यांच्या मार्गदर्शनातून आयुष आरोग्यवर्धिनी केंद्राच्या वैद्यकीय अधिकारी डॉ. सारिका कांबळे यांनी या दवाखान्यामध्ये आयुर्वेद प्रचार व प्रसारासाठी विशेष आरोग्य शिबीरे घेतली.

आयुर्वेद निदान, उपचार, विद्धकर्म, अग्नीकर्म, आयुर्वेद वनौषधी उद्यानामधून लोकांना त्याची ओळख करुन देवुन उपयुक्तता पटवून दिली. येत्या तीन वर्षांमध्ये आयुष ग्राम योजनेच्या माध्यमातून चोरे गावातील आयुर्वेद दवाखान्यात अनेक आयुर्वेद अभिनव उपक्रम राबवले जातील असे वैद्यकीय अधिकारी डॉ. काबळे यांनी सांगीतले.

`` जिल्ह्यातील आयुष आरोग्यवर्धिनी केंद्र चोरे याची राज्यस्तरावरील आयुष ग्राम या उपक्रमासाठी निवड होणे ही आरोग्य विभागासाठी नक्कीच कौतुकाची बाब आहे.´´

- डॉ. महेश खलिपे,जिल्हा आरोग्य अधिकारी सातारा.

" आयुष आरोग्यवर्धिनी केंद्र चोरे याची आयुष ग्राम या अभिनव उपक्रमासाठी निवड होणे ही कामाची एक उत्तम संधी आहेत. कमी मनुष्यबळात या आरोग्यसंस्थेने हे यश मिळवले आहे.भविष्यात येथे अनेक अभिनव उपक्रम राबवून येथील रुग्णांना अधिक आयुष आरोग्य सेवा देणेसाठी प्रयत्न केले जातील."

- डॉ. मिथुन पवार,जिल्हा आयुष अधिकारी, सातारा.