खासदार उदयनराजेंचा 'तो' ठराव कायम; मतदार यादीवर 46 'आक्षेप'

सातारा : जिल्हा बँकेच्या निवडणुकीसाठी (Satara Bank Election) कच्च्या मतदारयादीवर सुनावणी सुरू असून, यामध्ये खासदार उदयनराजे भोसले (MP Udayanraje Bhosale) यांच्या नावाचे कोणतेही ठराव रद्द झालेले नाहीत. तसेच जिल्हा बॅंकेनेही त्यांचे कोणतेही ठराव अपात्रतेच्या यादीत टाकलेले नाहीत. त्यांचे गृहनिर्माण आणि पाणीपुरवठा संस्थेतील ठराव योग्य व कायम आहेत, अशी माहिती उदयनराजेंचे समर्थक व माजी सभापती सुनील काटकर (Sunil Katkar) यांनी दिली.

जिल्हा बँकेच्या निवडणुकीसाठी कच्ची मतदार यादी प्रसिद्ध झाली आहे. या यादीवर ४६ आक्षेप दाखल आहेत. यामध्ये सर्वाधिक १९ आक्षेप सोसायटीच्या ठरावांवर आहेत. या आक्षेपांवर सुनावणीची प्रक्रिया सध्या विभागीय सहनिबंधक कार्यालयाकडून सुरू आहे. यामध्ये गृहनिर्माण संस्था आणि पाणीपुरवठा संस्थेतून खासदार उदयनराजे भोसले यांचे ठराव केलेले आहेत. यापैकी पाणीपुरवठा संस्थेतील ठराव जिल्हा बँकेने अपात्र ठरावाच्या यादीत टाकल्याचे विभागीय सहनिबंधक कार्यालयाकडून सांगण्यात आले होते.

याविषयी सुनील काटकर यांनी सांगितले, की उदयनराजेंचा कोणताही ठराव जिल्हा बँकेने अपात्रतेच्या यादीत टाकलेला नाही. त्यामुळे खासदार उदयनराजेंचा पाणीपुरवठा संस्थेतील कोणताही ठराव रद्द केलेला नाही. त्यांचे गृहनिर्माण आणि पाणीपुरवठा संस्थेतून केलेले सर्व ठराव योग्य असून, ते पात्र ठरावांच्या यादीतच आहेत. त्यामुळे त्यांचे कोणतेही ठराव रद्द अथवा अपात्र केलेले नाहीत, असे श्री. काटकर यांनी स्पष्ट केले आहे.