कासव चोरणं पडलं महाग, पोलिसांनी चोरट्यांना विचारला जाब!

सातारा : दोन दिवसांपूर्वी वाईतील खवले मांजर तस्करीप्रकरण ताजे असतानाच, आता कासव तस्करी करणाऱ्या दोघांना स्थानिक गुन्हे अन्वेषण विभागाने (एलसीबी) वाठार किरोली (ता. कोरेगाव) येथे जेरबंद केले आहे. प्रकाश अधिकराव चव्हाण (वय 28, रा. किरोली, ता. कोरेगाव) व सतीश भगवान साळवे (वय 30, वाठार, ता. कोरेगाव) अशी त्यांची नावे आहेत. 

वाठार किरोली परिसरात दोन युवक कासव विक्रीसाठी येणार असल्याची माहिती एलसीबीचे निरीक्षक सर्जेराव पाटील यांना मिळाली. त्यानुसार त्यांनी हवालदार विनोद गायकवाड यांच्या पथकाला याबाबतची कारवाई करण्याचे निर्देश दिले होते. त्यानुसार हे पथक वाठार किरोली परिसरात गेले. तेथील बेघर परिसरातील पाण्याच्या टाकीजवळ दोन युवक हातात पिशवी घेऊन संशयास्पद फिरत असल्याने त्यांच्या निदर्शनास आले.

वाईतील खवले मांजर तस्करीप्रकरणात रक्षकच बनला भक्षक! 

पोलिसांनी ताब्यात घेऊन त्यांच्याकडे चौकशी केली. त्या वेळी त्यांच्या जवळील पिशवीमध्ये अडीच लाख रुपये किमतीचे दुर्मीळ कासव आढळून आले. पोलिसांनी दोन्ही संशयित व कासव कोरेगाव वनक्षेत्रपाल यांच्याकडे पुढील कारवाईसाठी दिले आहे. या कारवाईत निरीक्षक सर्जेराव पाटील, सहायक फौजदार पृथ्वीराज घोरपडे, ज्योतीराम बर्गे, हवालदार विनोद गायकवाड, योगेश पोळ, राजकुमार ननावरे, नितीन भोसले, प्रवीण कडव, मयुर देशमुख हे सहभागी होते.

संपादन : बाळकृष्ण मधाळे