छत्रपतींबद्दल आक्षेपार्ह वक्तव्याप्रकरणी ऍड. सदावर्तेंवर साताऱ्यात गुन्हा

सातारा : छत्रपती घराण्याविषयी अपशब्द उच्चारत सामाजिक तेढ निर्माण करण्याचा प्रयत्न केल्याप्रकरणी शुक्रवारी सातारा शहर पोलिस ठाण्यात ऍड. गुणरत्न सदावर्ते (रा. मुंबई) यांच्यावर गुन्हा नोंदविण्यात आला आहे. याबाबतची फिर्याद राजेंद्र बाबुराव निकम (रा. तारळे, ता.पाटण) यांनी नोंदवली आहे. 

फिर्यादीत निकम यांनी म्हटले आहे की, सकल मराठा क्रांती मोर्चाच्या वतीने दि. 7 ऑक्‍टोबर रोजी मराठा आरक्षणाच्या अनुषंगाने बैठक आयोजित करण्यात आली होती. या बैठकीसाठी मी, तसेच इतर समाज बांधव उपस्थित होते. बैठक सुरु असतानाच ऍड. गुणरत्न सदावर्ते यांनी एका खासगी वृत्तमालिकेवर मुलाखतीदरम्यान छत्रपती घराण्याविषयी, तसेच खा. उदयनराजे भोसले आणि खासदार संभाजीराजे छत्रपती यांच्याविषयी अपशब्द उच्चारल्याची माहिती मिळाली.

छत्रपतींच्या वारसदारांचा अपमान कदापि सहन करणार नाही : गृहराज्यमंत्री शंभूराज देसाई 

यानुसार माहिती घेतली असता, ऍड. सदावर्ते यांनी अपशब्द घेतल्याचे समोर आले. ऍड. सदावर्ते यांनी जातीय दंगली भडकतील, सामाजिक तेढ निर्माण होवून अशांतता निर्माण होईल, यासाठी हे वक्‍तव्य केले असून त्यामुळे माझ्या भावना दुखावल्याचे फिर्यादीत नमूद केले आहे. याचा तपास सहाय्यक निरीक्षक बाजीराव ढेकळे हे करीत आहेत.  

संपादन : बाळकृष्ण मधाळे