हुतात्मा जवानाच्या पत्नीचा विनयभंग; चौघांविरोधात गुन्हा दाखल

नागठाणे (जि. सातारा) : देशसेवा बजावताना हुतात्मा झालेल्या जवानाच्या पत्नीचा विनयभंग केल्याची घटना परिसरातील एका गावात घडली. वीरपत्नीचा शारीरिक, मानसिक छळ केल्याप्रकरणी पोलिसांनी तिची सासू, सासरा, पोलिस दलात कार्यरत असलेली नणंद, तसेच नणंदेचा मित्र या चौघांविरुद्ध गुन्हा दाखल केला आहे.
 
पोलिसांकडून मिळालेल्या माहितीनुसार, ही वीरपत्नी बोरगाव पोलिस ठाण्यांतर्गत येत असलेल्या एका गावात राहते. तीन वर्षांपूर्वी तिचा पती सीमेवर कर्तव्य बजावत असताना हुतात्मा झाला होता. त्यानंतर ती सासू, सासरा व आपल्या दोन लहान मुलांसह तिथेच वास्तव्यास होती. तिची नणंद पोलिस दलात नोकरीस आहे. तिचे वरचेवर घरी येणे जाणे सुरू होते. या दरम्यानच्या काळात तिला शासनाकडून, तसेच अन्य सामाजिक संस्थांकडून मदत म्हणून मिळालेल्या रकमा सासू, सासरा व नणंद यांनी तिच्याकडून जबरदस्तीने काढून घेतल्या. सासू, सासरा व नणंद यांनी तिला "तू पांढऱ्या पायाची आहेस. चार वर्षसुद्धा संसार केला नाहीस,' असे म्हणून तिचा शारीरिक व मानसिक छळ केला.
 
सातारा येथे तहसीलदार कार्यालयात जबरदस्तीने नेले. तेथे तिच्याकडून हुतात्मा जवानाची पत्नी म्हणून मिळणारे सर्व लाभ तसेच जमीन, पेन्शन याबाबत हक्क सोडपत्र लिहून घेतले. हक्क सोडपत्र लिहून घेतले, तरीही ती घर सोडून जात नाही, हे लक्षात आल्यानंतर पोलिस दलात कार्यरत असलेल्या नणंदेने तिच्या मित्राला हेतूपूर्वक घरी बोलावून त्याच्याकरवी विनयभंग केला. याची माहिती तिने सासू, सासरे व नणंद यांना दिली असता याबाबत कोठे बोलायचे नाही नाहीतर तुला घरातून हाकलून देईन, अशी धमकी दिली, असे हुतात्मा जवानाच्या पत्नीने दिलेल्या फिर्यादीत म्हटले आहे. या घटनेची नोंद बोरगाव पोलिस ठाण्यात झाली असून, सहायक पोलिस निरीक्षक प्रशांत बधे पुढील तपास करत आहेत.

जीना यहाँ मरना यहाँ, इसके सिवा जाना कहाँ..; कलाकारांची रसिक मायबापांना आर्त हाक

घनकचरा प्रकल्पाबाबत त्वरित चौकशी करा; जयंवत पाटलांची जिल्हाधिकाऱ्यांकडे मागणी