Mahabaleshwar : महाबळेश्वरातील बस स्थानकात बॉम्ब? अज्ञाताचा पोलिसांना थेट फोन

महाबळेश्वर (सातारा) : येथील बस स्थानकातील एक चारचाकी वाहनात बॉम्ब (Bomb) असल्याची माहिती एका अज्ञाताने फोनवरून दिल्याने शहरात एकच खळबळ उडाली. काल सायंकाळी व बुधवारी दुपारपर्यंत विविध पथकांकडून बॉम्बचा शोध घेण्याचा प्रयत्न करण्यात आला; परंतु कुठेही बॉम्ब अथवा बॉम्बसदृश वस्तू आढळून न आल्याने शहरवासीयांचा जीव भांड्यात पडला. निनावी फोन करून बॉम्बची माहिती देणाऱ्या विरोधात आज पोलिस (Police) ठाण्यात गुन्हा दाखल करण्यात आला आहे.

पोलिसांच्या हाती काहीच लागलं नाही

बस स्थानकात बॉम्ब ठेवला असल्याचा फोन अज्ञाताने काल सायंकाळी सहा वाजण्याच्या सुमारास गाडी क्रमांकासह पोलिसांना केला होता. यानंतर तातडीने पोलिसांनी बस स्थानक, आगार परिसरात तपासणी केली. मात्र, पोलिसांच्या हाती काहीच लागले नाही. काल रात्रीपासून बस स्थानकात पोलिस बंदोबस्त वाढविण्यात आला होता; परंतु माहितीची खातरजमा करण्यासाठी आज पुन्हा सातारा येथून दहशतवाद विरोधी पथक, बॉम्बशोधक- नाशक पथक व श्वान पथक अशा विविध पथकांचे अधिकारी बस स्थानक परिसरात दाखल झाले होते.

वाहनांसह प्रवाशांच्या सामानाचीही तपासणी

या पथकांनी स्थानकातील प्रत्येक चारचाकी वाहनांसह प्रवाशांच्या सामानाचीही तपासणी सुरू केली. स्थानकातील बेवारस वाहनांची त्यांनी तपासणी करण्यात आली. बस स्थानकासमोरील टॅक्सीतळ व परिसरात तपासणी केली. पथकाने बाजारपेठेतही फेरफटका मारून बॉम्ब ठेवलेले वाहन शोधण्याचा प्रयत्न केला. तीन तासांच्या या तपासणीमध्ये बॉम्बसदृश कोणतीही संशयास्पद वस्तू सापडली नाही.