माशांचे गळ अन्‌ खाणाऱ्यांची चंगळ.!

कलेढोण (जि. सातारा) : खटाव तालुक्‍यातील तलावांत यंदा मुबलक पाणीसाठा झाल्याने स्थानिक जातीतील माशांची मोठी पैदास झाली आहे. त्यामध्ये चिलापी मासे पकडण्यासाठी येरळवाडी प्रकल्पात तरुणाई तोबा गर्दी करून असते. तलावात व तलावातील सांडव्यावरून पडणाऱ्या पाण्यात मासेमारी करणाऱ्यांची तोबा गर्दी होत आहे. त्यात सांगली जिल्ह्यातूनही मासेमारीसाठी येणाऱ्यांची संख्या लक्षणीय आहे. माशांचे गळ घेऊन येणाऱ्यांची मोठी चंगळ होताना दिसत आहे. 

येरळवाडी हा पाणीसाठ्याचा मध्यम प्रकल्प आहे. त्यात यंदा मुबलक पाणीसाठा होऊन येरळा नदी वाहू लागली आहे. त्यामुळे या नदीपात्रात व तलावात स्थानिक माशांची मोठी पैदास झाली आहे. त्यात चिलापीचे मोठे प्रमाण आहे. लॉकडाउनमध्ये घरी बसलेली तरुणाई हातात माशांचे गळ घेऊन तलावाकडे येऊन विरंगुळा म्हणून मासेमारीचा आनंद घेताना दिसत आहे. तलावात गळ व फेक जाळी टाकून दिवसाकाठी 50 ते 70 किलो मासे पकडताना दिसत आहेत. मासेमारी करण्यासाठी आलेल्या तरुणाईमुळे तलावावर तोबा गर्दी होत आहे. त्यासाठी मायणी, वडूज, अंबवडे, शिंदेवाडी, सूर्याचीवाडी, धोंडेवाडी, येरळवाडीसह सांगली जिल्ह्यातून तरुणाई दाखल होत आहे. तलावात सापडणाऱ्या माशांमुळे स्थानिक मच्छिमारांकडेही हॉटेल व्यावसायिक मोठी मागणी करत आहेत.

कायदा-सुव्यवस्थेसाठी आक्रमक भूमिका राहील : अजयकुमार बन्सल
 
यंदा मायणी, कानकात्रे, सूर्याचीवाडी, येरळवाडी या तलावांत मुबलक पाणीसाठा झालेला आहे. त्यामुळे नदी, ओढ्यातील स्थानिक माशांचे प्रजनन झाले असून, गावठी खेकड्यांची पैदासही होत आहे. कोरोनाकाळामध्ये मटण व चिकन दर वाढलेले असले तरी प्रतिकारशक्ती वाढविण्यासाठी ग्रामीण भागातील सर्वसामान्य जनता माशाला मोठी मागणी करत आहेत. येरळवाडीत तलावाच्या खाली सांडव्यावरून पडणाऱ्या पाण्यात फेक जाळ्याने व गळाने मोठ्या प्रमाणात मासेमारी होत आहे. त्यासाठी फुटाफुटावर तरुण हातात गळ धरून उभा असल्याचे दिसून येत आहे. त्यामुळे माशांचे गळ अन्‌ खाणाऱ्यांची चंगळ.., असे चित्र दिसत आहे. 

जिल्हा रुग्णालयात उपचार सुविधा त्वरित सुरु करा : आमदार शिवेंद्रसिंहराजे

एक तंगुस, चार गळ..! 
मुबलक सापडणाऱ्या माशांमुळे एका तंगुसाच्या काठीस चार-चार गळ लावून मासेमारी करण्याची नामी युक्ती शोधून मोठ्या प्रमाणात मासे पकडले जात आहेत. यावरून तलावात यंदा मोठ्या प्रमाणात माशांची पैदास झाल्याचे दिसून येत आहे. 

संपादन : बाळकृष्ण मधाळे