Success Story : व्वा रं पठ्ठ्या! स्पर्धा परीक्षेचं शिक्षण घेत युवकाची बटाटा शेतीत विक्रमी कामगिरी

विसापूर (जि. सातारा) : पुणे येथे स्पर्धा परीक्षेची तयारी करत असलेले पुसेगाव येथील भूमिपुत्र धनंजय गुरव यांनी तीन एकर क्षेत्रात आधुनिक तंत्रज्ञानाचा वापर करीत बटाट्याची लागवड कमी खर्चात करून विक्रमी उत्पादन घेतले. त्यात त्यांनी खर्च वजा जाता सव्वादोन लाख रुपयांचे उत्पन्न मिळवले आहे. 

खरंतर गावात हाताला काम मिळत नाही, शेतीतून जास्त उत्पन्न निघत नाही, कमी शेतीत जास्त सदस्यांचा उदरनिर्वाह होत नाही, शिक्षणाची सोय नाही, अशा एक ना अनेक कारणांमुळे ग्रामीण भागातील शेकडो तरुणांनी शहराचा रस्ता धरला होता. शहरांनीही त्यांना रोजीरोटी देत आपलेसे करून घेतले होते. सणसुद, लग्नकार्य आदी कौटुंबिक कार्यक्रमासाठी येणारी शहरातील ही मंडळी शेतीकामापासून दूरच होती. परंतु, कोरोना संसर्गाच्या काळात शहरातील काम सुरू होण्याची खात्री नसल्याने अर्थार्जनासाठी बहुतांश भूमिपुत्रांनी आपल्या घरच्या शेतीत खरीप हंगामातील नगदी पिके घेतली होती. त्यात त्यांनी चांगले उत्पन्न घेतले असून कोरोनाच्या टाळेबंदीबरोबरच आर्थिक संकटावर मातदेखील केली आहे. 

एफआरपी अधिक 200 द्या; शेतकरी संघटनांचा आक्रमक पवित्रा

कोरोनाच्या संकटात सक्तीची सुटी मिळाल्याने आधुनिक तंत्रज्ञानाचा उपयोग करून बटाटा शेती केल्याने वेळ, पैशाची बचत तर झालीच, शिवाय तीन एकरांत 180 क्विंटल उत्पादन मिळाले. साडेचार लाख रुपयांचे उत्पन्न झाले असून, खर्च वजा जाता सव्वादोन लाख रुपये नफा मिळाल्याचे श्री. गुरव यांनी सांगितले. 

संपादन : बाळकृष्ण मधाळे