'राजीनाम्याच्या धमकीमुळं घरफळा कमी, गोलमाल करण्याचा प्रयत्न'

खटाव : ग्रामपंचायत निवडणुकीपूर्वी (Gram Panchayat Election) परिवर्तन पॅनेलच्या नेत्यांनी खटावकरांचा घरफळा माफ करण्याचे आणि पाणीपट्टी स्वतः भरण्याचे आश्वासन दिले होते. त्यांच्याच काही सदस्यांनी या विषयावर आक्रमक भूमिका घेत राजीनाम्याची धमकी दिल्यानेच ग्रामसभेत घरफळा कमी करण्याचा निर्णय घेऊन गोलमाल करण्याचा प्रयत्न करण्यात आल्याचा आरोप माजी सरपंच कॅप्टन बबनराव घाडगे (Babanrao Ghadge) यांनी केला.

येथे झालेल्या ग्रामसभेत ग्रामपंचायतीने घरफळा कमी करण्याच्या घेतलेल्या निर्णयाला श्री. घाडगे यांनी विरोध दर्शवत निवेदनाद्वारे आक्षेप घेतला. श्री. घाडगे यांनी म्हटले आहे की, ग्रामपंचायत निवडणुकीपूर्वी परिवर्तन पॅनेलच्या नेत्यांनी जाहीर सभेत घरफळा माफ करू, तसेच पाणीपट्टी स्वतःच्या खिशातून भरू, अशी आश्वासने दिलेली होती. निवडणूक होऊन अडीच वर्षे झाली तरी दिलेल्या आश्वासनांची पूर्तता झाली नव्हती. कोरोनासारख्या काळातही गावात घरपट्टी व पाणीपट्टीची सक्तीने वसुली सुरूच होती आणि आहे.

‘परिवर्तन’च्याच काही सदस्यांनी ग्रामपंचायत बैठकांत घरफळा व पाणीपट्टीबाबत आक्रमक भूमिका घेत निवडणुकीत मते मिळविण्यासाठी गावकऱ्यांना दिलेली आश्वासने पाळा अन्यथा राजीनामा घ्या, अशी भूमिका घेतली. त्यामुळे नाईलाजाने ग्रामसभेचे आयोजन करण्यात आले आणि येणाऱ्या निवडणुका डोळ्यासमोर ठेऊन घरफळा कमी करण्याचे नाटक करण्यात आले आहे. गावकऱ्यांनी ‘परिवर्तन’च्या आश्वासनांवर एकदा विश्वास ठेऊन बघितले आहे. सूज्ञ गावकरी आता पुन्हा त्यांच्या आश्वासनांना भुलणार नाहीत.’’ याप्रश्‍नी जे बैठकीमधून उठून गेले होते आणि राजीनामा देतो बोलले होते, त्यांचे मी अभिनंदन करतो. या सत्ताधारी ग्रामपंचायत सदस्यामुळेच घरफळा कमी करण्याचा निर्णय सत्ताधाऱ्यांना घ्यावा लागल्याने त्यांनी याचे श्रेय घेऊ नये, असा सल्लाही श्री. घाडगे यांनी दिला.