खिरखंडीतील मुलींना मिळाली यांत्रिक बोट

कास : खिरखंडी (ता. जावळी) येथील मुलींच्या शिक्षणासाठीची धावपळ व विदारक परिस्थिती सर्वांसमोर आली. असुरक्षित अशी लाकडाची होडी चालवत येत असल्याने या मुलींना कोयना विभागाचे सुपुत्र व बांधकाममंत्री एकनाथ शिंदे व त्यांचे सुपुत्र खासदार श्रीकांत शिंदे यांनी स्व खर्चाने यांत्रिक बोट उपलब्ध करून दिली. आज पहिल्यांदाच या मुलींनी या बोटीतून प्रवास करत शाळा गाठली.

दै. ‘सकाळ’मधून खिरखंडीतील मुलींच्या शिक्षणाबाबतची दुरवस्था मांडली होती. या वृत्तानंतर इतर माध्यमांनी हा विषय उचलून धरल्याने मुंबई उच्च न्यायालयानेही या मुलींची दखल घेतली. दुर्गम बामणोली खोऱ्यातील खिरखंडीतून कोयना जलाशय पार करत पुन्हा अंधारीपर्यंत चार- पाच किलोमीटरचा घनदाट जंगलातील प्रवास करत या मुली शाळेत पोचत होत्या.

ही परिस्थिती पाहून मूळ दरे गावी आलेल्या मंत्री एकनाथ शिंदे व खासदार श्रीकांत शिंदे यांनी तत्काळ या मुलींना रोज शाळेत कोयना जलाशय पार करून सकाळी आणि संध्याकाळी सोडण्यासाठी यांत्रिक बोट उपलब्ध करून दिली. खासदार शिंदे यांनी प्रत्यक्ष खिरखंडीला भेट देऊन लोकांच्या समस्या जाणून घेतल्या. या बोटीमुळे मुलींचा रोजचा होडी चालवण्याचा त्रास कमी झाला आहे. जिल्हा प्रशासनाच्या वतीने मुलींना फायबर बोट उपलब्ध करून दिली जाणार आहे. काही सामाजिक कार्यकर्त्यांनी लाइफ जॅकेट उपलब्ध करून दिली आहेत.