कऱ्हाड : १ हजार ३२३ रेशन दुकाने आयएसओ प्रमाणित! | Sakal
sakal

बोलून बातमी शोधा

Government approved ration shops 1323 ISO certified satara

कऱ्हाड : १ हजार ३२३ रेशन दुकाने आयएसओ प्रमाणित!

कऱ्हाड : सरकारमान्य रेशिंग दुकानाकडे बघण्याचा ग्रामीण भागातील लोकांचा दृष्‍टिकोन चांगला नाही. तो तसा होण्यास त्यातील यंत्रणाही कारणीभूत आहे. हा दृष्‍टिकोन बदलून सर्वसामान्य ग्राहकांना रेशनिंग दुकान आपलेसे वाटावे, यासाठी सर्व रेशनिंग दुकाने, गोदामे, पुरवठा कार्यालये आयएसओ प्रमाणित करण्यात येत आहेत. त्याअंतर्गत जिल्ह्यातील एक हजार ३२३ दुकाने आयएसओ प्रमाणित झाली आहेत. या दुकानांतून ग्राहकांना आता दर्जेदार सेवा मिळण्यास मदत होईल.

सर्वसामान्य लोकांपर्यंत शासकीय योजनांतून स्वस्त मिळणारे अन्नधान्य पोचवण्याचे काम जिल्ह्यातील सरकारमान्य स्वस्त धान्य दुकानांतून केले जाते. त्याव्दारे हजारो गरजूंना धान्याचा पुरवठा केल्याने त्यांचा उदरनिर्वाहाचाही प्रश्न सुटतो. मात्र, हे रेशनिंगचे धान्य ग्राहकांपर्यंत पोचताना अनेकदा गैरप्रकार झाल्याचे यापूर्वीच्या घटनांतून स्पष्ट झाले आहे. त्याचबरोबर अनेक धान्य दुकानांत अस्वच्छतेबरोबर उंदरांचेही साम्राज्य असते. त्यामुळे स्वस्त धान्य दुकानांकडे बघण्याची सर्वसामान्यांची मानसिकता बदलली आहे. स्वस्त धान्य दुकानात काळाबाजार होतो, असाही लोकांचा समज आहे. त्याला त्यात काम करणारी यंत्रणाही जबाबदार आहे. हा समज बदलून लोकांना धान्य दुकान आपलेसे वाटावे, यासाठी आता पुरवठा उपायुक्त डॉ. त्रिगुण कुलकर्णी यांनी संबंधित दुकाने आयएसओ करण्याची संकल्पना मांडली.

त्याला सर्व दुकानदार, जिल्हा पुरवठा अधिकाऱ्यांनीही ग्रीन सिग्नल दिला. त्यानुसार आता ती कार्यवाही सुरू आहे. दुकानांची रंगरंगोटी करणे, धान्य विक्रीचा दरफलक लावणे, दुकानात अग्निशामक यंत्रणा कार्यान्वित ठेवणे, प्रथमोपचार पेटी, सीसीटीव्ही कॅमेरे, नाईट व्हिजन कॅमेरे, अन्नभेसळ विभागाचा परवाना असणे, ज्‍येष्ठ नागरिक, महिलांना बसण्याची व्यवस्था, पिण्यासाठी स्वच्छ पाण्याची सोय करणे यांसह धान्य दुकानांचा ‘लुक’ चांगला ठेवणे आदी बाबींचा त्यात समावेश आहे. त्यानुसार जिल्ह्यातील एक हजार ६७८ रेशनिंग दुकानांपैकी एक हजार ३२३ दुकाने आयएसओ प्रमाणित झाली आहेत. त्यामुळे ग्राहकांना आता दर्जेदार सेवा मिळण्यास मदत होणार आहे.

जिल्ह्यातील पहिला मान कऱ्हाडला

सातारा जिल्ह्यातील सर्व रेशनिंग दुकाने पुरवठा उपायुक्त डॉ. कुलकर्णी यांच्या संकल्पनेतून जिल्हा पुरवठा अधिकारी स्नेहा किसवे यांच्या मार्गदर्शनाखाली आयएसओ करण्यात येत आहेत. रेशनिंग दुकानदार संघटनेचे जिल्हाध्यक्ष अशोकराव पाटील यांनी जिल्ह्यात पहिल्यांदा त्यांचे कऱ्हाडमधील दुकान आयएसओ प्रमाणित केले. अन्न व नागरी पुरवठामंत्री छगन भुजबळ यांच्या हस्ते त्यांना प्रमाणपत्राचे वितरण करण्यात आले.

सातारा जिल्ह्यातील सरकारमान्य स्वस्त धान्य दुकाने, पुरवठा कार्यालये आणि धान्य साठवणुकीची गोदामे आयएसओ मानांकित करत आहोत. २० गोदामे, ११ कार्यालयांसह १,३२३ दुकाने आयएसओ प्रमाणित झाली आहेत. येत्या महिनाभरात जिल्ह्यातील सर्व दुकाने आयएसओ मानांकित होऊन ग्राहकांना चांगली सेवा मिळेल.

- स्नेहा किसवे-देवकाते,जिल्हा पुरवठा अधिकारी, सातारा

Web Title: Government Approved Ration Shops 1323 Iso Certified Satara

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top