ढेबेवाडी खोऱ्याला वादळी पावसाचा जोरदार तडाखा; घरे-दुकानांसह शाळांचे नुकसान, झाडे मोडली, विजेचे खांब वाकले

ढेबेवाडी : परिसराला काल दुपारी वादळी पावसाने अक्षरशः झोडपून काढले. शाळेसह, दुकानगाळे आणि घरांवरील छप्परे वादळात उडून गेली. रस्त्यांवर, तसेच वाहनावर झाडे मोडून पडली. विजेचे खांब कोसळल्याने विभागातील वीजपुरवठा खंडित झाला होता. गेल्या तीन आठवड्यांत विभागाला बसलेला वादळी पावसाचा हा दुसरा मोठा तडाखा असून, त्यामध्ये मोठे नुकसान झाल्याचा अंदाज आहे. साधारणपणे दीड तास झालेल्या पावसाने अनेक ठिकाणचे ओढे नाले दुथडी भरून वाहिले.

परिसरात आज दुपारी साडेबारानंतर वादळी पावसाला सुरुवात झाली. अचानक आलेल्या पावसाने लोकांची मोठी तारांबळ उडाली. वादळात मानेगाव येथील जिल्हा परिषद प्राथमिक शाळेच्या इमारतीवरील पत्रे उडाले. काही पत्रे दूरवर उडून झाडावर अडकले होते. शाळेला सध्या उन्हाळी सुटी असल्याने सुदैवाने दुर्घटना टळली. मानेगाव - कुंभारगाव रस्त्यावर विजेच्या खांबासह झाड रस्त्यावर कोसळल्याने वाहतूक ठप्प होती.

ढेबेवाडी- कऱ्हाड मार्गावर येथील पुलापासून जवळच तसेच धामणी, मान्याचीवाडी, गलमेवाडी (कुंभारगाव), साबळेवाडी या परिसरात अनेक झाडे मोडून रस्त्यावर पडली होती. साबळेवाडी येथे घराजवळ लावलेल्या दत्तात्रय भीमराव साबळे यांच्या कारवर झाड पडल्याने कारचे नुकसान झाले. मान्याचीवाडी येथील बबनराव माने, गलमेवाडीत सखाराम चोरगे, मस्करवाडी (धामणी) येथील शत्रुघ्न मस्कर, तसेच पाटील आवाडजवळही एका घरांचे वादळात नुकसान झाले.

तळमावले येथील मुख्य रस्त्यावर असलेल्या तीन दुकान गाळ्यांवरील छप्पर उडाल्याने गाळ्यासह साहित्याचेही नुकसान झाले. वादळी पावसात विजेचे खांब मोडून वाहिन्या तुटल्याने अनेक ठिकाणचा वीजपुरवठा खंडित झाला होता. वादळाने आंब्याचे अतोनात नुकसान झाले आहे.गलमेवाडी, मान्याचीवाडी येथील ओढे पावसाने भरून वाहत होते.

...तीन आठवड्यांत दुसऱ्यांदा तडाखा

गेल्या महिन्यात २४ तारखेला विभागातील काळगाव, धामणी व परिसरातील वाड्यावस्त्यांना वादळी पावसाचा जोरदार तडाखा बसला होता. त्या वेळी सुमारे ४५ लाखांचे नुकसान झाल्याचा अंदाज बांधण्यात आला होता. त्या वेळी पंचनामे होऊनही अद्याप शासकीय मदत मिळाली नसल्याचे नुकसानग्रस्तांचे म्हणणे आहे.