वादळी पावसाने दाणादाण; कऱ्हाडमध्ये घरांत, दुकानांत घुसले पाणी

कऱ्हाड (जि. सातारा) : वादळी पावसाचा कऱ्हाड शहरासह तालुक्‍याला मोठा फटका बसला. गुरुवारी रात्री अचानक वाऱ्यासह आलेल्या पावसाने येथील भाजी मंडईत मोठ्या प्रमाणात पाणी साचले. अनेकांच्या घरात, दुकानात पाणी घुसले. त्याचबरोबर अनेकांचीही वाहनेही नादुरुस्त होऊन मोठे नुकसान झाले. दरम्यान, तालुक्‍यातील काही ठिकाणी झाडे पडूनही मोठे नुकसान झाले. कऱ्हाड-तासगाव मार्गावर पाणी साचून काहीकाळ वाहतूक ठप्प झाली. 

शहरासह तालुक्‍यातील वादळी पावसाने झोडपून काढले. त्यामध्ये काही ठिकाणी पिकांचे नुकसान झाले. महामार्गाकडेच्या सेवा रस्त्यावरही पाणी साचून राहिले होते. त्याचबरोबर शहरातील भाजी मंडईला पावसाचा मोठा फटका बसला. त्या परिसरात मोठ्या प्रमाणात पाणी साचून राहिले. पाण्याचा निचरा न झाल्याने साचलेले पाणी अनेकांच्या घरात, दुकानात घुसले. त्यामुळे त्यांचे नुकसान झाले. पावसाच्या उघडीपीनंतर रात्री उशिरापर्यंत पाणी बाहेर काढण्याचे काम तेथील नागरिक करत होते. रस्त्याकडेला लावलेल्या वाहनांच्या सायलेन्सरमध्येही पावसाचे पाणी गेले. त्यामुळे वाहनेही नादुरुस्त होऊन मोठे नुकसान झाले. दरम्यान, तालुक्‍यातील काही ठिकाणी झाडे पडल्याने वीजपुरवठा खंडित झाला. त्याचबरोबर भाजीपाल्याच्या व पालेभाज्यांच्या पिकांचे मोठे नुकसान झाले. 

मराठा आरक्षणाच्या मुद्द्यावर शिवेंद्रसिंहराजेंनी स्पष्ट केली भूमिका

प्रशासकीय इमारतीच्या तळघरात पाणी : सर्व शासकीय कार्यालये एकाच छत्राखाली यावे, या हेतूने येथे प्रशासकीय इमारत बांधण्यात आली आहे. वादळी पावसाचा जोर मोठा असल्याने त्या इमारतीच्या तळघरात पाणी साचून राहिले. तेथे पार्किंगची सोय करण्यात आली आहे. पावसाचे पाणी साचल्याने तेथे लावलेल्या कर्मचाऱ्यांच्या वाहनात पाणी जाऊन त्याही नादुरुस्त झाल्या. 

शाश्वत उत्पन्नासाठी आता ग्राम कृषी विकास समिती, शासनाचा निर्णय

कऱ्हाड-तासगाव मार्गावरील वाहतूक ठप्प 

रेठरे बुद्रुक : गुरुवारी रात्री झालेल्या मुसळधार पावसामुळे कऱ्हाड-तासगाव मार्गावरील वाहतूक पावसाच्या पाण्यामुळे ठप्प झाली. तीन वर्षांपासून रखडलेल्या रस्त्याच्या कामामुळे त्या परिसरातील शेती जलमय झाली. अंगणवाडी इमारतीत पाणी शिरून नुकसान झाले. रस्त्यावर पाणी असल्याने आज दिवसभर राष्ट्रीय मार्गावरील वाहतूक टप्प झाली होती. रस्त्यावर पाणी असल्याने जीवघेणा प्रवास करण्यापेक्षा प्रवाशांनी पर्यायी मार्गाचा अवलंब केला. यामुळे त्यांना कसरत करावी लागली.

परतीच्या पावसाचा माणला जोरदार तडाखा, बाजरीसह मूग पिकाचे मोठे नुकसान 

वडगाव हवेली येथील लेंडोरी नावाच्या ओढ्याला पूर आल्याने सोनारकी नावाच्या शिवारात असणारा कऱ्हाड-तासगाव मार्गावरील फरशी पूल पाण्याखाली गेला. त्यामुळे मध्यरात्रीपासून सकाळी दहा वाजेपर्यंत वाहतूक ठप्प झाली होती. रस्त्याच्या दुतर्फा वाहनांच्या रांगा लागल्या होत्या. रस्त्यावरील वाहतूक धोक्‍याचे असल्याने प्रवाशांनी दिवसभर तेथून प्रवास करणे टाळले. पावसाने तलावातून होणारा विसर्ग कोटर ओढ्याला होऊन ओढ्याला पूर परिस्थिती निर्माण झाली. गावातील धनगर वस्तीतील काही घरात व कोडोली फाटा येथील खंडोबा मळ्यातील अंगणवाडी इमारतीत ओढ्याचे पाणी घुसून शाळेतील शालेय दप्तर व पोषण आहार साहित्य भिजून नुकसान झाले. 

संपादन : बाळकृष्ण मधाळे