सातारा : कोरोनाच्या पार्श्वभूमीवर सार्वजनिक गणेशोत्सव साजरा करण्यावर निर्बंध घातल्यामुळे व ग्रामस्थांमध्ये असलेल्या भीतीच्या वातावरणामुळे गणेश उत्सवावर मोठा परिणाम झाला. यामुळे ५० टक्क्यांहून अधिक गणेश मूर्ती शिल्लक राहिल्याने कुंभार समाजाचे सुमारे १० कोटी रुपयांचे आर्थिक नुकसान झाले आहे. कुंभार समाजाला आर्थिक मदत मिळावी यासाठी जिल्हाधि-यांना सातारा जिल्हा कुंभार समाज विकास संस्थेच्यावतीने निवेदन देण्यात आले.
याबाबत निवेदनात दिलेली माहिती अशी, सातारा जिल्ह्यामध्ये दीड हजारांहून अधिक कुंभार कुटुंबे गणेश मूर्ती बनवण्याचा व्यवसाय करतात. जिल्ह्यामध्ये मोठ्या प्रमाणात सार्वजनिक गणेशोत्सव साजरा केला जातो. त्यामुळे यातील बहुतांशी मूर्तिकारांनी चार फुटांपेक्षा अधिक उंचीच्या मूर्ती तयार केल्या होत्या. मात्र, शासनाने यावेळी चार पेक्षा अधिक उंचीची मूर्ती बसण्यास बंदी घातली. तसेच एक गाव एक गणपती उपक्रम राबविल्यामुळे मोठ्या मूर्ती प्रत्येकाकडे शिल्लक राहिल्या आहेत. मूर्तीकरांकडे पुरेशी जागा उपलब्ध नसल्याने या तयार केलेल्या गणेश मूर्ती या उन्ह, वारा व पाऊस यामध्ये राहणार असल्याने या पुढील वर्षी वापरणे शक्य होत नाही.
कोरोनाचा वाढता प्रभाव लक्षात घेऊन अनेक कुटुंब शहर सोडून खेड्याकडे गेल्यामुळे प्रति वर्षी होणाऱ्या गणेश मूर्ती विक्रीमध्ये पन्नास टक्क्यांहून अधिक घट आली आहे. तसेच अनेक कुटुंबांनी घरगुती गणेश मूर्ती बसवण्यासाठी प्रतिवर्षी प्रमाणे उत्साह दाखवला नाही. त्यातच अनेक मूर्तीकार हे पी.ओ.पी.च्या गणेश मूर्ती बनवत असतात. पुढील वर्षी शासनाने पी.ओ.पी. गणेश मूर्ती विक्री व विसर्जनास शासनाने बंदी घातल्यामुळे या वर्षी शिल्लक राहिलेल्या गणेश मूर्ती पुढील वर्षी विक्री करता येणार नाहीत, त्यामुळे दुहेरी संकटात कुंभार समाज सापडला आहे.
झालेले नुकसान हे कुंभार समाजाला न सोसण्याच्या पलिकडचे असल्याने शासनाने याकडे लक्ष घालून जास्तीत-जास्त आर्थिक मदत कुंभार समाजाला द्यावी, अशी मागणी या निवेदनात करण्यात आली आहे. या निवेदनावर संस्थेचे जिल्हा कार्याध्यक्ष बळवंत कुंभार, जिल्हाध्यक्ष भरत कुंभार, सचिव आर. आर. कुंभार, सातारचे माजी उपनगराध्यक्ष भाग्यवंत कुंभार, नितीन राजे, किशोर कुंभार, नितीन कुंभार, दिनकर कुंभार, सुहास कुंभार, गोविंद कुंभार, सचिन राजे, महेश कुंभार व विजय कुंभार यांच्या सह्या आहेत.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.