धोका वाढला! ढेबेवाडीच्या पोलिस ठाण्यालाही कोरोनाचा विळखा

ढेबेवाडी (जि. सातारा) : परिसरात कोरोनाचा विळखा दिवसेंदिवस अधिकच घट्ट होत चालला आहे. कालरात्री ढेबेवाडीसह परिसरातील विविध गावांत कोरोनाचे 15 रुग्ण सापडले. येथील पोलिस ठाण्यातही कोरोनाचा संसर्ग झाला असून, 20 दिवसांपूर्वी कोरोना पॉझिटिव्ह आढळलेल्या 55 वर्षीय पोलिस हवालदारांचा काल रात्री कऱ्हाड येथे उपचारादरम्यान मृत्यू झाल्याने पाच महिन्यांपासून रस्त्यावर असलेले कोरोना योद्धेही असुरक्षित असल्याचे दिसून येत आहे. 

ढेबेवाडीसह परिसरात कोरोनाच्या रुग्णांचा आकडा दोनशेच्या घरात निघाला आहे. त्यामध्ये स्थानिक व्यावसायिक, मुंबईकर, ज्येष्ठ नागरिक, पोलिस, होमगार्ड, पोलिस पाटील आदींचा समावेश आहे. काल रात्री येथील पोलिस ठाण्यातील एका हवालदाराचा कऱ्हाड येथील रुग्णालयात उपचारादरम्यान मृत्यू झाला. त्यांच्याकडे न्यायालयीन ड्युटी होती. मनमिळाऊ, शिस्तप्रिय व कर्तव्यदक्ष कर्मचारी म्हणून त्यांची ओळख होती. दरम्यान, येथील पोलिस ठाण्यातील एकूण पाच कर्मचारी व होमगार्ड यापूर्वीच कोरोना पॉझिटिव्ह आले आहेत. 

कोरोना लढाईत प्रशासनाला हवी नेत्यांची साथ; कऱ्हाडकर शासनाच्या भरवशावर!

मार्चमध्ये लॉकडाउन जाहीर झाल्यापासून येथील पोलिस कर्मचारी, होमगार्ड, पोलिस पाटील, आरोग्य कर्मचारी, आशा स्वयंसेविका, अंगणवाडी सेविका- सहायिका आणि काही ग्रामपंचायतींचे सरपंच, ग्रामसेवक, कर्मचारी आदी घटक रस्त्यावर उतरून सेवा बजावत आहेत. ठिकठिकाणी पोलिसांनी सुरू केलेले चेकनाके लॉकडाउन शिथिल झाल्यानंतरही सुरूच ठेवण्यात आले आहेत. एकूणच वाढत्या रुग्णांबरोबरच योद्‌ध्यांवरील ताणही येथे वाढत चालल्याचे चित्र आहे. 

बेड मिळत नसल्याने कोरोनाग्रस्त काढताहेत आशांवर राग!

काल रात्री या परिसरात 15 कोरोनाबाधित रुग्ण सापडले. ढेबेवाडीतील 3, गुढे 5, साबळेवाडी 3, धुमाळवाडी 3 आणि मोरेवाडीतील एका रुग्णाचा त्यात समावेश आहे. दरम्यान, येथील पोलिस ठाण्यात 32 कर्मचारी कार्यरत आहेत. खबरदारी म्हणून पोलिस कर्मचाऱ्यांची कोरोना चाचणीही केली जात आहे. त्यामध्ये पाच कर्मचारी व एक होमगार्ड बाधित आढळले आहेत. या पार्श्वभूमीवर पोलिस ठाण्यात जंतुनाशकाची नियमितपणे फवारणी केली जात आहे. तक्रार अर्ज घेऊन येणाऱ्यांना अर्ज जमा करण्यासाठी पेटी ठेवली असून, दोरी आडवी लावून परिसर प्रतिबंधित केला आहे. 

संपादन : बाळकृष्ण मधाळे