Indian Army : साताऱ्यानं गमावला आणखी एक जवान; कर्तव्य बजावताना प्रशांत भोसलेंना मध्यप्रदेशात वीरमरण

सातारा : भारतीय लष्कारात (Indian Army) कार्यरत असलेल्या सातारा जिल्ह्यातील कोरेगाव तालुक्यातील वेळू गावचे सुपुत्र जवान प्रशांत भोसले (वय 38) यांना मध्यप्रदेशमधील सागर (Sagar in Madhya Pradesh) इथं कर्तव्य बजावत असताना वीरमरण आलं.

सैन्य दलाच्या वतीनं उद्या (गुरुवारी) वेळू या गावी त्यांचं पार्थिव आणण्यात येणार आहे. त्यानंतर शासकीय इतमामात अंत्यसंस्कार करण्यात येणार आहेत. साताऱ्यातील वेळू गावचे सुपुत्र असलेल्या प्रशांत मनोहर भोसले (Prashant Bhosale) यांनी आपलं प्राथमिक शिक्षण गावातील जिल्हा परिषद शाळेत पूर्ण केलं. शेतकरी कुटुंबात जन्मलेल्या जवान प्रशांत यांच्या मनात देशसेवेची आस असल्यामुळं कमी वयात ते सैन्यात भरती झाले.

दरम्यान, प्रशांत भोसले यांचं मध्यप्रदेशातील सागर इथं कर्तव्य बजावत असताना ह्रदय विकाराच्या धक्क्यानं निधन झालं. प्रशांत यांच्या पश्चात आई, भाऊ, पत्नी, वहिनी, एक मुलगा, एक मुलगी, पुतण्या, पुतणी असा परिवार आहे. जवानाच्या निधनामुळं गावावर शोककळा पसरली आहे.