कऱ्हाडला थकबाकीदार झळकणार फ्लेक्सवर!

कऱ्हाड : शासकीय कार्यालयांसह शहरातील करवसुलीवर पालिकेने लक्ष केंद्रित केले आहे. शहरातील थकबाकीदारांची नावे फ्लेक्सवर (flex)लिहून ते फ्लेक्स सार्वजनिक ठिकाणी लावले जाणार आहेत. शासकीय कर वसुलीलाही पालिकेने स्वतंत्र व्यवस्था केली आहे. आतापर्यंत पाच कोटींची वसुली पालिकेने केली आहे. अद्यापही १४ कोटींची थकबाकी वसूल होणे बाकी आहे. त्यात शासकीय कार्यालयांची सव्वाकोटीच्या आसपास वसुली बाकी आहे. त्यासाठी पालिकेने कंबर कसली आहे. शहराचे चार वेगवेगळे भाग करून पाच पथकांकडे वसुलीची जबाबदारी दिली आहे.

शहरातील प्रांताधिकारी, तहसीलदार, पोलिस उपअधीक्षक, पंचायत समिती उपजिल्हा रुग्णालयासह शहरातील तब्बल १२ हून अधिक विविध शासकीय कार्यालयांकडे पाच वर्षांपासून पालिकेची तब्बल सव्वाकोटीची कराची थकबाकी आहे. त्यासोबत शहरातील नागरिकांकडूनही पाणीपट्टी व घरपट्टीची थकबाकी शिल्लक आहे. पालिकेला कोरोनामुळे कोणतेही उत्पन्नाची स्रोत नसल्याने पालिकेने करवसुलीवर लक्ष केंद्रित केले आहे. त्यासाठी पाणी व घरपट्टीच्या वसुलीसाठी मोठे निर्णय मुख्याधिकारी रमाकांत डाके घेत आहेत. शहरातील मोठ्या थकबाकीदारांची नावे फ्लेक्सवर लिहून ते फ्लेक्स सार्वजनिक ठिकाणी लावले जाणार आहेत, अशी माहिती श्री. डाके यांनी दिली. त्यामुळे नागरिकांनी पालिकेचा संकलित कर भरून सहकार्य करण्याचे आवाहन श्री. डाके यांनी केले आहे. शहराचे चार वेगवेगळे भाग करून तेथील नागरिकांच्या थकीत कराच्या वसुलीसाठी स्वतंत्र पथके नेमली आहेत. शासकीय थकबाकीही कोटीत आहे. या वसुलीचे आव्हान आहे.(satara news)

शासकीय कार्यालयांचा थकीत कर

• प्रांताधिकारी ११ लाख ४६ हजार १४२ दोन लाख ५० हजार ९०१

• तहसीलदार ३२ लाख ९६ हजार ५६८ ३२ हजार ८०२

• पंचायत समिती एक लाख ६४ हजार ८०७ ५२ हजार ४८०

• उपजिल्हा रुग्णालय १७ लाख ९७ हजार ४३५ ९८ हजार

• बीएसएनएल १५ लाख ८ हजार ६११ २२ हजार ७७०

• जिल्हा परिषद बांधकाम तीन लाख ७७ हजार ८८७ ४३ हजार ०१०

• सार्वजनिक बांधकाम ३ लाख ३ हजार १४५ सात हजार १२०

• सातारा जिल्हा परिषद दोन लाख ८५ हजार ४३७ शून्य

• कृष्णा कालवा उपविभाग दोन लाख ६७ हजार ०४९ शून्य

• रेव्हेन्यू क्लब ११ लाख २९ हजार ६८३ १७ हजार २१५