पुण्यातील सातारकरांसाठी उदयनराजेंचा पुढाकार

सातारा : रेल्वेच्या संदर्भातील सर्व प्रश्‍नांवर तातडीने कार्यवाही केली जाईल. सातारा-पुणे शटल सेवा सुरू करण्यातबाबत पुणे विभाग सकारात्मक असून, लवकरच निर्णय घेतला जाईल, अशी ग्वाही रेल्वेच्या पुणे विभागाच्या व्यवस्थापिका रेणू शर्मा यांनी पुणे येथील बैठकीत दिली. रेल्वेच्या विविध समस्या व प्रलंबित मागण्यांबाबत पुणे येथे नुकतीच महत्त्वपूर्ण बैठक झाली.
 
प्रारंभी पुणे विभागाच्या व्यवस्थापिका रेणू शर्मा यांनी खासदार उदयनराजे भोसले यांचे स्वागत केले. या वेळी उदयनराजे भोसले यांनी सातारा जिल्ह्यातील रेल्वेच्या विविध समस्या मांडल्या. ते म्हणाले, की रेल्वे लाइनचे दुहेरीकरण करण्यासाठी संपादित होणाऱ्या जमीन मालकांच्या समस्या जाणून घेऊन संपादनाची कार्यवाही पूर्ण करावी. भूसंपादनासाठी मंजूर केलेल्या 33 कोटी रुपयांपैकी केवळ एक कोटीचे वाटप झाले आहे. उर्वरित वाटप तातडीने करावे. सातारा- पुणे रेल्वेची शटल सेवा सुरू करावी. जिल्ह्यातील रेल्वे क्रॉसिंगवर ब्रिटिशांपासून असलेली फाटक पद्धत बंद करून तेथे स्वयंचलित फाटके व नवीन पुलांची उभारणी करावी, यासह रेल्वेसंबंधीचे अनेक प्रश्‍न व त्यावरच्या उपाययोजना त्यांनी नमूद केल्या, तसेच जिल्हा पातळीवर पुणे विभागाच्या अधिकारी व प्रतिनिधी यांची 15 दिवसांतून एकदा बैठक बोलावून रेल्वेचे प्रश्‍न सोडवण्यासाठी गतिमान प्रशासन पद्धत अवलंबावी, अशा सूचना केल्या.

या वेळी खासदार उदयनराजे भोसले, रेल्वेच्या पुणे विभागाच्या व्यवस्थापिका रेणू शर्मा, रेल्वेचे कमर्शियल इंजिनिअरिंग व इतर विभागांतील अधिकारी, भूसंपादन विभागाचे अधिकारी, तसेच जिल्हा परिषदेचे माजी सभापती सुनील काटकर, भरतराव माने, रॉबर्ट मोझेस, ऍड. डी. जी. बनकर, संग्राम बर्गे, जितेंद्र खानविलकर, काका धुमाळ, शफीक इनामदार, अजय मोहिते, मनोज सोळंकी आदींसह महसूल विभागाचे अधिकारी उपस्थित होते. 

रेणू शर्मा म्हणाल्या, ""खासदार उदयनराजे भोसले यांच्या सूचनांनुसार तातडीने योग्य ती कार्यवाही केली जाईल. 15 दिवसांतून एकदा जिल्हास्तरावर चर्चा व्हावी म्हणून बैठक घेऊन उपाययोजना केल्या जातील. सातारा ते पुणे शटल सेवा सुरू करण्याबाबत पुणे विभाग सकारात्मक आहे.'' लवकरच शटल सेवा सुरू करण्याचा निर्णय घेतला जाईल, असे त्यांनी नमूद केले.

'या' कामाचे श्रेय फक्त आणि फक्त उदयनराजेंच; काेणी उठविला आवाज वाचा सविस्तर

महत्त्वाची बातमी : सातारकरांनाे या दिवशी पाणी येणार नाही

ज्‍वेलर्स व्‍यावसायिकाच्‍या मृत्‍यूबाबत संभ्रम... मल्‍हारपेठ बाजारपेठेत खळबळ

दरम्यान खासदार उदयनराजे भाेसले यांनी रेल्वेचा एक माेठे प्राजेक्ट सातारा जिल्ह्यात आणण्याचा नुकताच निर्धार व्यक्त केला आहे. सातारा पुणे शटल सेवा सुरु झाल्यास पुण्यातील सातारकरांनाही त्याचा लाभ हाेईल असे मत नागरिकांनी व्यक्त केले. 

संपादन : सिद्धार्थ लाटकर