सातारा जिल्ह्यात कोरोनाग्रस्त रुग्णांची संख्या शंभरीपार

सातारा - जिल्ह्यात गेल्या २४ तासांत कोरोनाबाधितांच्या संख्येने शंभरी ओलांडली आहे. जिल्ह्यात आज एकूण ११४ जण बाधित आढळून आले असून त्यांच्यावर विविध रुग्णालयांमध्ये उपचार सुरू आहेत. तसेच जिल्ह्यात ध्या ३२५ सक्रिय रुग्ण असल्याची माहिती आरोग्य विभागाने दिली आहे.

फलटण, सातारा, कऱ्हाड तालुक्यांत वाढती बाधितांची संख्या चिंताजनक आहे. मागील महिनाभरापूर्वी दररोज सरासरी १० ते १५ रुग्ण आढळून येत होते. कऱ्हाड तालुका १३, जावळी- ७, खंडाळा- ४, खटाव- ६, कोरेगाव- १३, माण- ८, फलटण- २०, सातारा- ३०, वाई- ९, पाटण- १, महाबळेश्वर तालुका एक व इतर एक असे एकूण ११४ बाधित आढळून आले आहेत.

सध्या थंडी, ताप, खोकला, डेंगीचे रुग्ण आढळून येत आहेत. नागरिकांनी घाबरून न जाता जवळचे प्राथमिक आरोग्य केंद्र, ग्रामीण आरोग्य केंद्र, उपकेंद्रांमध्ये उपचार घेऊन आरोग्य विभागाच्या सूचनांचे पालन करावे, असे आवाहन जिल्हा आरोग्य अधिकारी डॉ. राधाकिशन पवार यांनी केले आहे.