साताऱ्यातील बालसुधारगृहात अल्पवयीन संशयिताची आत्महत्या

सातारा : वडूज पोलिसांनी (Vaduj Police Station) अत्याचाराच्या गंभीर गुन्ह्यात ताब्यात घेतलेल्या अल्पवयीन संशयिताने सातारा येथील सदर बझार परिसरातील बालसुधारगृहात आज सकाळी आत्महत्या केली. हे समजताच मृताच्या नातेवाइकांनी बालसुधारगृहाबाहेर जमण्यास सुरूवात केल्याने तिथे पोलिसांनी मोठा फौजफाटा तैनात केला आहे.

याबाबतची माहिती अशी, की खटाव तालुक्यातील एका गावात राहणार्‍या अल्पवयीन तरूणावर एका युवतीने अत्याचार केल्याचा गुन्हा वडूज पोलीस ठाण्यात नोंदविला होता. त्यानुसार पोलिसांनी संशयिताला ताब्यात घेतले. संशयित अल्पवयीन असल्याने न्यायालयाने त्याला निरीक्षण गृहात ठेवण्याचे आदेश दिले होते. यानुसार त्या अल्पवयीन संशयितांची रवानगी साताऱ्यातील बालसुधारगृहात करण्यात आली होती. येथील कक्षात तो गेली काही दिवस राहत होता. त्याने बालसुधारगृहातच आत्महत्या केल्याचे शनिवारी सकाळी समोर आले.

या घटनेची माहिती निरीक्षण गृह व्यवस्थापनाने सातारा शहर पोलिसांना (Satara Police Station) दिली. माहिती मिळताच, सहाय्यक पोलीस अधीक्षक आंचल दलाल, पोलीस निरीक्षक भगवान निंबाळकर यांनी घटनास्थळी धाव घेतली. त्यांनी पाहणी करत सदर घटनेची माहिती पोलीस अधीक्षक अजय कुमार बन्सल यांना दिली. यानंतर वडूज पोलीस ठाण्याने या घटनेची माहिती मृत युवकाच्या नातेवाईकांना दिली. घटनेची माहिती मिळताच, संबंधित युवकाच्या नातेवाइकांनी बालसुधारगृहाबाहेर जमण्यास सुरुवात केली असून, तिथे मोठा पोलिस बंदोबस्त तैनात करण्यात आला आहे. युवकाविरोधात अत्याचाराची तक्रार नोंदविलेल्या युवतीस, तसेच तिच्या कुटुंबीयांना पोलिसांनी सुरक्षित ठिकाणी हलवले आहे.