कळसूत्री बाहुली म्हणून नगराध्यक्षांना खुर्चीवर बसवलंय

सातारा : सर्वसामान्य कुटुंबातील महिला असल्याचा गाजावाजा करून सातारकरांना भुलवून एका सामान्य महिलेला नगराध्यक्ष केले. परंतु, त्यांना केवळ कळसूत्री बाहुली म्हणून खुर्चीवर बसविण्यात आले. निवडणूक जवळ आल्यानंतर सत्ताधाऱ्यांनी विविध विकासकामांचे नारळ फोडले. मात्र, या कार्यक्रमांमध्ये नगराध्यक्षा माधवी कदम (Mayor Madhavi Kadam) कुठेही दिसत नसून त्या हरवल्या आहेत का? असा प्रश्न शहरवासीयांना पडला आहे, असा उपरोधिक टोला सातारा पालिकेचे (Satara Municipality) विरोधी पक्षनेते अशोक मोने (Opposition Leader Ashok Mone) यांनी लगावला आहे.

ते म्हणाले, ‘‘सातारकरांना भूलथापा मारून आणि फसवून पालिकेची सत्ता काबीज केलेल्यांनी गेल्या पाच वर्षांत पालिका अक्षरशः धुवून काढली. टक्केवारी आणि टेंडरसाठी एकमेकांचे गळे धरणाऱ्या सत्ताधाऱ्यांकडून पाच वर्षांत सातारकरांसाठी काहीही केले नाही. नगराध्यक्षा तर केवळ नामधारी बनून राहिल्या. त्यांनी काही करायचं म्हटलं तरी त्यांच्यातलाच दुसरा गट त्यांचे हात बांधून टाकायचा. काही दिवसांपासून तर नगराध्यक्षा गायब असल्याचे चित्र आहे. नेत्यांच्या उपस्थितीत मोठा गाजावाजा करत शहरात अनेक ठिकाणी नारळ फुटले. विकासकामे, रस्ते आणि चौकांच्या नावाचे नारळ फुटले हे सातारकरांना काही समजले नाही. अशा या अनोख्या आणि महत्त्‍वाच्या कार्यक्रमांतही नगराध्यक्षा उपस्थित नसल्याचे आश्चर्य आहे.’’

दरम्यान, माजी नगराध्यक्षा रंजना रावत यांच्यासारखे कदम यांनाही सक्तीच्या रजेवर पाठवले की काय? अशी शंकाही निर्माण झाली आहे. कार्यकाल संपत आल्याने गेले पाच वर्षांपासून सत्ताधाऱ्यांच्या मनमानीला वैतागलेल्या नगराध्यक्षांनी पळ तर काढला नाही ना? सर्वसामान्य घरातील महिला नगराध्यक्ष सातारा पालिकेला मिळाली आहे, हे दाखवण्यासाठी तरी त्या पालिकेत हजर पाहिजेत. त्यामुळे गायब झालेल्या नगराध्यक्षा कदम यांचा शोध घेणाऱ्याला आपण संपूर्ण पोशाख करू, असा टोला मोने यांनी लगावला आहे.