फलटण शहर : फलटणच्या नागरिकांचा आंदोलनाचा इशारा | Sakal
sakal

बोलून बातमी शोधा

water scarcity Phaltan

फलटण शहर : फलटणच्या नागरिकांचा आंदोलनाचा इशारा

फलटण शहर : नगरपालिकेच्या इमारतीपासून केवळ शंभर फुटांवर असणाऱ्या काही घरांना गेली चार वर्षे कृत्रिम पाणीटंचाईस सामोरे जावे लागत आहे. याबाबत नागरिकांनी वेळोवेळी केलेल्या तक्रारींना पालिकेकडून वाटाण्याच्या अक्षदा लावण्यात आल्याने संतप्त नागरिकांनी बेमुदत धरणे आंदोलनाचा इशारा दिला आहे.शहरातील मेटकरी गल्लीतील नगरपालिकेच्या नवीन इमारतीपासून हाकेच्या अंतरावर असलेल्या काही घरांना नगरपालिकेच्या गैरकारभारामुळे गेल्या चार वर्षांपासून कृत्रिम पाणीटंचाईस सामारे जावे लागत आहे. याबाबत येथील नागरिकांनी वेळोवेळी तोंडी, लेखी तक्रारी, अधिकाऱ्यांशी समक्ष चर्चा करूनही हा प्रश्न सोडविण्यास नगरपालिकाला अपयश आले आहे. नगरपालिकेकडून या प्रश्नाबाबत जाणीवपूर्वक दुर्लक्ष केले जात असल्याचा आरोप नागरिकांमधून होत आहे.

कृत्रिम पाणीटंचाईमुळे खासगी टँकरद्वारे पाणी विकत घ्यावे लागत असल्याने नागरिकांना आर्थिक भुर्दंड सोसावा लागत आहे. नगरपालिकेपासून हाकेच्या अंतरावर पाणी न मिळणे व चार वर्षांत हा प्रश्न न सुटणे या गंभीर बाबी असून, यामध्ये कोणी लक्ष घालणार आहे की नाही, असा सवालही येथून व्यक्त होत आहे. उन्हाळ्यात पाणी मिळणार नसेल, तर स्थलांतर करावे लागण्याची भीतीही या परिसरातून व्यक्त होत आहे. त्यामुळे नगरपालिकेने हा प्रश्न तातडीने सोडवावा अन्यथा आगामी दोन एप्रिलपासून नगरपालिकेसमोर बेमुदत धरणे आंदोलन करण्यात येईल, असा इशारा मुख्याधिकाऱ्यांना निवेदनाद्वारे देण्यात आला आहे.

माहिती न दिल्याने शास्ती...

पाणी येत नसल्याच्या कारणावरून येथील आय्याज कोतवाल यांनी नळ कनेक्शनबाबत माहितीच्या अधिकारात नगरपालिकेत माहिती मागविली होती; पण त्यांना माहिती मिळाली नाही. त्यानंतर अपिलात गेल्यावर माहिती देण्याचे निर्देश देण्यात आले. सुनावणीवेळी नगरपालिकेतील तत्कालीन सहायक जन माहिती अधिकारी यांनी मुदतीत उत्तर न दिल्याचे मान्य केल्याने २०१७ रोजी त्यांना दोन हजार रुपयांची शास्ती लावण्यात आली होती. त्यानंतरही हा प्रश्न सोडविण्यासाठी नगरपालिकेकडून कुठलीही हालचाल झाली नाही.

Web Title: Phaltan Municipality Water Scarcity Warning Citizens

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top