महाविकास की भाजप; सातारा जिल्हावासियांना उत्सुकता निकालाची

सातारा : पुणे पदवीधर व शिक्षक मतदारसंघ निवडणुकीसाठी सातारा जिल्ह्यात एकूण "पदवीधर'साठी 58.27 टक्के, तर "शिक्षक'साठी 81.96 टक्के मतदान झाले. जिल्ह्यातील काही मतदान केंद्रावरील किरकोळ वाद वगळता सर्वत्र शांततेत मतदान प्रक्रिया पार पडली.

यंदाच्या निवडणुकीत महाविकास आघाडी आणि भारतीय जनता पक्ष यांच्यातील उमेदवारांतच रस्सीखेच आहे. त्यामुळे मतदान केंद्राबाहेर सर्वच पक्षाचे लोकप्रतिनिधी व कार्यकर्ते दिवसभर ठाण मांडून बसले होते. मतदानासाठी सकाळच्या सुमारास मतदारांचा निरुत्साह दिसून आला होता. मात्र, दुपारनंतर मतदारांनी केंद्राबाहेर रांगा लावल्याने मतदानाची टक्केवारी वाढल्याचे दिसून आले. पुणे पदवीधर व शिक्षक मतदारसंघासाठी मतदारांनी मोठ्या उत्साहात मतदान केले.

तुम्हाला मुंबईशी पंगा घ्यायचाय का? संजय राऊतांचा योगींना इशारा 

कोविड संसर्गाच्या काळातील ही पहिलीच निवडणूक असल्याने प्रत्येक मतदाराची केंद्रात प्रवेश करताना तपासणी केली जात होती. कोरोनाच्या प्रादुर्भावातही मतदार घराबाहेर पडल्याचे चित्र पाहावयास मिळाले. "पदवीधर'साठी जिल्ह्यात सकाळी दहा वाजेपर्यंत 7.21 टक्के, तर "शिक्षक'साठी 10.65 टक्के मतदान झाले होते. 12 वाजेपर्यंत "पदवीधर'चे 20.23 टक्के, तर "शिक्षक'साठी 31.34 टक्के मतदान झाले. दुपारी दोन वाजेपर्यंत मतदानाच्या आकडेवारीत काही प्रमाणात वाढ होऊन "पदवीधर'चे 34.86 टक्के मतदान झाले होते, तर "शिक्षक'साठी 56.43 टक्के मतदान झाले होते. दुपारी दोननंतर मतदारांनी केंद्राबाहेर रांगा लावत मतदान केल्याचे पाहावयास मिळाले. दुपारी चार वाजेपर्यंत "पदवीधर'साठी 49.35 टक्के, तर "शिक्षक'साठी 74.36 टक्के मतदान झाले होते. सायंकाळच्या सुमारास मतदार मोठ्या संख्येने घराबाहेर पडल्याचे आकडेवारीवरून दिसून येते.
 
कोरोनाच्या पार्श्‍वभूमीवर सुरक्षेच्या दृष्टीने मतदान केंद्रावर आरोग्य विभागाचे कर्मचारी उपाययोजनांची काटेकोरपणे अंमलबजावणी करताना दिसून आले. खबरदारीचा उपाय म्हणून मतदान केंद्रात प्रवेश करताना मतदारांची सॅनिटायझर, थमल स्क्रिनद्वारे तपासणी केली जात होती. त्याचबरोबर मास्क घालण्याबाबत वेळोवेळी सूचना दिल्या जात होत्या. 

कुणाला कुठे उतरायचे तिथे उतरु द्या : उदयनराजे