केंद्र, राज्य सरकारची मदत देऊ; जानकरांचं पूरग्रस्तांना आश्वासन

मोरगिरी (सातारा) : केंद्र सरकार, राज्य सरकारचीही तुम्हाला मदत मिळेल. तुम्ही घाबरायचे कारण नाही. तुम्ही खचून जाऊ नका, असा आधार राष्ट्रीय समाज पक्षाचे (Rashtriy Samaj Party) नेते महादेव जानकर (Mahadev Jankar) यांनी आंबेघर, शिद्रुकवाडी (Patan Taluka Landslide) येथील दुर्घटनेत मृत्युमुखी पडलेल्यांचे कुटुंबीय व स्थलांतरित केलेल्या कुटुंबातील लोकांशी भेट घेऊन दिला. मोरगिरीतील मोरणा विद्यालयात मोरणा गुरेघर धरणांतर्गत वसलेले आंबेघर, त्याचबरोबर शिद्रुकवाडी येथील बाधित कुटुंबांतील लोकांशी भेट घेण्यासाठी ते येथे आले होते. त्याचदरम्यान त्यांनी लोकांशी संवाद साधला.

त्यांनी संबंधित कुटुंबातील लोकांशी व स्थलांतरित करण्यात आलेल्या कुटुंबांतील व्यक्तींची आपुलकीने विचारपूस केली. त्यांना येणाऱ्या अडचणी समजावून घेतल्या. जनावरे मृत्युमुखी पडलेल्या लोकांना अर्थार्जनाचे साधन म्हणून त्यांना मदत केली. केंद्र सरकारची तुम्हाला मदत मिळेल, राज्य सरकारची मदत मिळेल. तुम्ही घाबरायचे कारण नाही. एका एका घरातील सहा सहा माणसांचा या दुर्घटनेत मृत्यू होऊन कुटुंबे उद्ध्वस्त झाली आहेत. मात्र, तुम्ही खचून जाऊ नका, अशा शब्दांत त्यांनी आधार दिला. मंडल अधिकारी, तलाठी माहिती घेऊन पंचनामे करतील. मदत देताना दुजाभाव केला जाणार नाही, असेही त्यांनी सांगितले.