ग्रामीण भागात एसटीला अद्याप 'ब्रेक'; लांब पल्ल्याच्या गाड्या सुसाट

बिजवडी (जि. सातारा) : प्रवाशांच्या सेवेसाठी हे ब्रीद वाक्‍य घेऊन ग्रामीण भागातील प्रवाशांची जीवन वाहिनी ठरलेल्या लालपरीची (एसटी) चाके अजूनही ग्रामीण भागात धावू न शकल्याने ग्रामीण भागातील प्रवाशांना लालपरीची प्रतीक्षा करावी लागत आहे. 

कोरोनाचा संसर्ग वाढू लागल्याने मार्च महिन्यात लावण्यात आलेल्या लॉकडाउननंतर लालपरीची चाके जाग्यावर थांबली. कोरोना विषाणूचा प्रादुर्भाव रोखण्यासाठी शासनाने लॉकडाउन जाहीर करण्यासह विविध उपाययोजना करत राज्यात परिवहन महामंडळाची बससेवा बंद केली. तेव्हापासून थांबलेली चाके तब्बल सहा ते सात महिने जागेवरच आहेत. शासनाने आता अनलॉक करत बंद ठेवण्यात आलेल्या सुविधा हळूहळू सुरू केल्या आहेत. राज्य परिवहन महामंडळाने आपली बससेवा शहरी भागात सुरू केली; परंतु ग्रामीण भागात अद्याप सुरू केलेली नाही. ज्येष्ठ नागरिक, आबालवृद्धांना लालपरीची प्रकर्षाने जाणीव होत आहे. ग्रामीण भागातील बससेवा सुरू नसल्याने नागरिकांना अवैध वाहतुकीवर अवलंबून राहावे लागत आहे, तसेच दवाखाना, कार्यालयीन कामासाठी तालुक्‍याच्या ठिकाणी ये-जा करण्यासाठी खासगी वाहनाचा आधार घ्यावा लागत असल्याने प्रवाशाचे हाल होत आहेत. सध्या सणासुधीचे दिवस असल्याने ग्रामीण भागातील बससेवा सुरू करण्याची मागणी जोर धरू लागले आहे. 

शाहूपुरी पोलिस ठाण्यात रात्री पाेहचले उदयनराजे; नोंदविली तक्रार

ग्रामीण भागात अजूनही वाहतुकीच्या पुरेशा सोयीसुविधा उपलब्ध नसल्यामुळे सर्वसामान्य नागरिक, आबालवृद्ध, प्रवाशांना ये- जा करण्यासाठी परिवहन महामंडळाचा आधार मिळतो. लॉकडाउनच्या शिथिलतेनंतर शहरी भागात राज्य परिवहन मंडळाची बससेवा सुरू करण्यात आली; परंतु ग्रामीण भागात अजूनही ही बससेवा बंद असल्यामुळे प्रवाशांना अनेक गैरसोयींचा सामना करावा लागत आहे. 
-अर्जुन अवघडे, वावरहिरे, ता. माण 

संपादन : बाळकृष्ण मधाळे