काटेवाडीत काळजावर दगड ठेवून शेतकऱ्यांनी कोबीच्या उभ्या पिकात सोडली मेंढरे

बुध (जि. सातारा) : गेल्या काही दिवसांपासून कोबी व टोमॅटोच्या दरात मोठी घसरण झाल्याने भाजीपाला उत्पादकांचे लाखो रुपयांचे नुकसान झाले आहे. कोबी, टोमॅटो व फ्लॉवरला किलोस दोन ते तीन रुपये दर मिळत असल्याने शेतकऱ्यांत अस्वस्थता पसरली आहे. भाजीपाला काढणीचा खर्चही निघत नसल्याने अनेक शेतकऱ्यांनी पीक काढणी थांबविली आहे, तर काही शेतकऱ्यांनी शेतात मेंढरे चरावयास सोडली आहेत. 

उत्तर खटाव परिसरातील डिस्कळ, पसूचामळा, शिंदेवाडी, बुध, काटेवाडी, करंजओढा, ललगुण, नागनाथवाडी आदी गावांतील शेतकरी विहिरीच्या पाण्यावर वर्षभर वांगी, कोबी, फ्लॉवर, टोमॅटो, मेथी, कोथिंबीर आदी भाज्यांची लागवड करतात. सध्या सर्वत्र भाज्यांची मोठ्या प्रमाणात आवक होत असल्यामुळे भाज्यांना कवडीमोल दर मिळत आहे. टोमॅटोची निदान दोन-तीन रुपये दराने विक्रीतरी होत आहे. परंतु, कोबीची अवस्था याहून बिकट झाली आहे. 

एकरकमी एफआरपीचे आंदोलन चिघळणार?; शेट्टींचा पाटलांसह साखर आयुक्तांना इशारा

बाजारात कोबीला मागणी नसल्याने कोबी आणू नका, अशी सूचनाच व्यापाऱ्यांकडून होत असल्याने कोबीत जनावरे सोडण्याशिवाय शेतकऱ्यांकडे पर्याय उरला नाही. उत्पादन खर्च तर दूरच तोडणीचा खर्चही निघत नसल्याने डिस्कळ, बुध, काटेवाडी परिसरातील शेतकऱ्यांनी काळजावर दगड ठेवून कोबीच्या उभ्या पिकात मेंढरे चरावयास सोडली आहेत. दरम्यान, शेतमाल आणि कोणत्याच भाजीपाल्याला भाव मिळत नसल्याने शेतकऱ्यांपुढे आर्थिक संकट उभे राहिले असल्याची माहिती टोमॅटो उत्पादक संतोष कोरडे, कोबी उत्पादक शिवाजी कोरडे यांनी दिली. 

शेतकरी खूष! साखरेपेक्षा एफआरपीचा दर जास्त; जिल्ह्यात कारखाने अडचणीत

संपादन : बाळकृष्ण मधाळे