चुकला काळजाचा ठाेका... चालकाविनाच चाललेल्‍या मोटारीचा अखेर टळला धोका...

वडूज (जि. सातारा) : येथील वडूज- कऱ्हाड रस्त्यावर स्टेट बॅंकेच्या परिसरात नेहमी गजबजलेल्या बाजारपेठेतच असा चालकाविना चारचाकी रस्त्याने धावण्याचा प्रकार आज दुपारी साडेबारा वाजण्याच्या सुमारास घडला. बॅंकेच्या परिसरात परगावाहून आलेली एक चारचाकी रस्त्यावरच उभी करून चालक काहीतरी साहित्य खरेदी करण्यासाठी नजीकच्या दुकानात गेला. 

चालक दुकानात जात असतानाच इकडे न्यूट्रल कंडिशनमध्ये असलेली चारचाकी उतारामुळे हळूहळू पुढे पुढे सरकू लागली. काही क्षणांत चारचाकी वाहनाने थोडाफार वेग घेतला होता. चालकाविना चारचाकी पुढे जात असल्याचे काही नागरिकांच्या लक्षात आले. त्या वेळी नागरिकांनी आरडाओरडा करून इतर नागरिकांना सावध करण्याचा प्रयत्न केला. मुख्य रस्त्यावर व गजबजलेल्या बाजारपेठेत असणारे हे चारचाकी वाहन अचानकपणे चालकाविना धावत असल्याचे पाहून नजीकचे नागरिक सैरावैरा धावू लागले. काही नागरिक वाहनाच्या पाठीमागे ओढून वाहन थांबविण्याचा प्रयत्न करीत होते. 

रस्त्याला उतार असल्याने वाहन जादा वेग धारण करीत होते. वाहन थांबविण्याचे नागरिकांचे प्रयत्न व्यर्थ ठरत होते. सुमारे शंभर ते दिडशे फूट अंतरात हा सगळा थरार सुरू होता. अखेरीस वाहन उजव्या दिशेला वळून एका नजीकच्या दुकानाच्या दिशेने जाऊ लागले. त्या वेळी एका युवकाने प्रसंगावधान राखत वाहनात प्रवेश करून स्टेअरिंगवर ताबा मिळविला. तोपर्यंत अगदी दुकानाच्या नजीक वाहन पोचले होते, त्या वेळी काही नागरिकांनी पंक्‍चर दुकानासमोरील टायर वाहनाला आडवे टाकून वाहन थांबविण्याचा प्रयत्न सुरू केला. अखेरीस युवकाने ब्रेक मारून वाहन थांबविल्यानंतर सर्वांनीच सुटकेचा नि:श्वास टाकला. वाहनचालकाने घडल्या प्रकाराबद्दल सर्वांची माफी मागितली. भर दुपारी बाजारपेठेत गजबजलेल्या वेळेत घडलेल्या या थरारक प्रकाराची चर्चा मात्र नागरिकांत दिवसभर होती.