कऱ्हाड (जि. सातारा) ः कऱ्हाड पालिकेतील राजकारण कारणाविनाही नेहमीच गाजते. कोरोनाच्या लढ्यात सगळीकडे एकजूट होती. मात्र, कऱ्हाड पालिकेत कोरोनातील स्थितीवरून नगरसेवकात वाद दिसला. मासिक बैठकीत नगरसेवक किरकोळ कारणाने एकमेकांवर धावून गेले. त्यामुळे स्थायी समितीची सभा महत्त्वाची होती. ती काल (ता. 3) बोलावण्यात आली. मात्र, एनवेळी चक्रीवादळाचे कारण देत ती रद्दही करण्यात आली. नगराध्यक्षा रोहिणी शिंदे यांनी स्थायी समितीची सभा रद्दची नोटीस काढली. सलग दुसरी सभा त्यांनी रद्द केली. त्यामागे अशीच तत्कालीन कारणे आहेत. मात्र, खरे कारण राजकीय घडामोडींचेच आहे. सभा रद्द होण्यामागे कारण जरी वादळाचे असले, तरी चक्रे राजकारणाचीच फिरल्याचे दिसते.
कऱ्हाड पालिकेच्या राजकीय हालचाली वेगवेगळ्या पातळीवर चर्चेच्या ठरतात. कोरोनाच्या कामांच्या मंजुरी देण्यास झालेल्या सभेतही नगरसेवक एकमेकांच्या अंगावर धावून गेले होते. सगळीकडे कोरोनाच्या लढ्यात एकजूट होती. मात्र, कऱ्हाडला त्याच कोरोनाच्या लढ्यात श्रेयवाद शिरला होता. त्यामुळे झालेली सभा वादळी, एकमेकांवर आरोप करणारी ठरली. पालिकेच्या सर्वसाधारण सभा गाजतातच. मात्र, त्याहीपेक्षा गाजते, ती स्थायी समितीची सभा. त्या समितीत पालिकेच्या कामांचा गाभा असतो. कोणाला टेंडर द्यायचे, कोणाचा पत्ता कट करायचा, कोणाची जिरवायची अशी सगळी सारासार चर्चा तेथे होते. त्यामुळे खरी ताकद नगरसेवक तेथेच लावतात. अलीकडे त्याही सभेत होणारी चर्चा बाहेर गाजते.
टक्केवारीमुक्त पालिका करणार असल्याचे अनेकांनी जाहीर केले होते. त्यांनाही विश्वासात न घेता काही विषय होत आहेत. त्यामुळे पालिकेच्या स्थायी समितीत वादळी चर्चा होणार होती. त्यामुळे वादळाचे कारण दाखवून ती सभा रद्द करण्यात आल्याची चर्चा आहे. "निसर्ग' चक्रीवादळामुळे निर्माण होणारे वातावरणही येथे गंभीर आहे, हेच कारण स्थायी समितीची सभा रद्द करण्यास पुरेसे ठरले. लगेच सभा रद्द झाल्याची नोटीस नगराध्यक्षा शिंदे यांनी काढली. चक्रीवादळाने निर्माण होणारी स्थितीचे कारण दाखविण्यात आले असले, तरी खरे कारण हे पालिकेच्या सभेतच कळाले असते. त्यामुळे ते वादळ टाळण्यासाठी चक्रीवादळाचा आधार घेण्यात आला. कोकणच्या किनारपट्टीवर आदळणाऱ्या चक्रीवादळाने कऱ्हाड पालिकेच्या राजकीय वर्तुळातील चक्रीवादळ रोखले खरे, मात्र पुढच्या बैठकीत येणारे वादळ, त्यातून निर्माण होणीर स्थिती कोण रोखणार, हाच खरा प्रश्न आहे.
टेंडरवरून तक्रारी...
पालिकेच्या टेंडरराजवरून जिल्हाधिकाऱ्यांकडे यापूर्वी काही तक्रारी दाखल झाल्या आहेत. त्या तक्रारींचा आढावा बैठकीत घेण्यात येणार होता, अशी खात्रीशीर माहिती आहे. त्यामुळे स्थायी समितीची सभा अत्यंत महत्त्वाची होती. त्यासोबतच टेंडरच्या विषयावर चर्चा होणार होती. मात्र, तुर्तास तरी सार काही थांबले आहे. "स्थायी'ची हीच सभा आता सोमवारी (ता. 8) होणार असल्याचे संकेत आहेत. त्यामुळे "स्थायी'ची पुढची होणारी सभाही चांगलीच गाजणार, अशीच चर्चा आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.