फलटणात मटका अड्ड्यांवरील छाप्यात दोघांना अटक; पोलिसांकडून मुद्देमालासह रोकड जप्त

फलटण शहर (जि. सातारा) : दोन मटक्‍याच्या अड्ड्यांवर शहर पोलिसांनी टाकलेल्या छाप्यात साडेसव्वीस हजारांचा मुद्देमाल जप्त केला असून, दोघांवर गुन्हा दाखल झाला आहे. 

पोलिसांकडून मिळालेली माहिती अशी, की बुधवारी (ता. 3) सायंकाळी साडेपाचच्या सुमारास पाचबत्ती चौक येथे रस्त्याच्या कडेला असलेल्या गाळ्यात अजय आनंद अहिवळे (वय 27, रा. मंगळवार पेठ, फलटण) हा पैशावर राजधानी व कल्याण नावाचा मटका स्वीकारताना आढळला तसेच त्याच्याकडून सहा हजार 765 रुपयांची रोख रक्कम, 15 हजार रुपयांचा मोबाईल, शंभर रुपयांचा कॅल्क्‍युलेटर व मटक्‍याच्या पावत्यांच्या नोंदवह्या असा एकूण 21 हजार 870 रुपये किमतीचा मुद्देमाल मिळून आला आहे. याबाबतची फिर्याद पोलिस नाईक संदीप लोंढे यांनी दिली असून, अजय अहिवळे याच्याविरोधात गुन्हा नोंद झाला आहे. 

खटाव तालुक्यातील अवैध धंदे बंद करा; राष्ट्रवादी महिला आघाडी आक्रमक

पुढील तपास पोलिस नाईक विक्रांत लावंड करीत आहेत. अन्य एका टाकलेल्या छाप्यात याचदिवशी सायंकाळी साडेसातच्या सुमारास जयभवानी कॉम्प्लेक्‍स येथील हॉटेल आसराशेजारी नीलेश राजेंद्र विटकर (रा. घडसोली मैदान, फलटण) हा बेकायदेशीरपणे कोणताही परवाना नसताना राजधानी नावाचा मटका घेताना मिळून आला. त्याच्याकडे 720 रुपये, चार हजार रुपयांचा मोबाईल व पेन असा चार हजार 725 रुपयांचा मुद्देमाल मिळून आला आहे. याबाबतची फिर्याद पोलिस नाईक महेश बोडरे यांनी दिली असून, नीलेश विटकर याच्याविरोधात गुन्हा नोंद झाला आहे. पुढील तपास पोलिस हवालदार फरांदे करीत आहेत.  

मलठणमध्ये गावगुंडांकडून विद्यार्थिनींची छेडछाड; वाढत्या दहशतीविरुद्ध नागरिक आक्रमक

संपादन : बाळकृष्ण मधाळे