Satara : ढेबेवाडी बस स्थानकात प्रवाशांची घोषणाबाजी

ढेबेवाडी : दुर्गम डोंगराळ भागातील अनेक गावांची एसटी बससेवा अचानक विस्कळित होत असल्याने जिंती विभागातील प्रवाशांनी येथील बस स्थानकात उभ्या अन्य बसचा ताबा घेत खाली न उतरण्याचा पवित्रा घेतला. यावेळी पोलिसांनी धाव घेत प्रवाशांना समजावण्याचा प्रयत्नही केला. परंतु, ते ऐकण्याच्या मनस्थितीत नव्हते. वारंवार मागणी करूनही बससेवा सुरळीत नसल्याने प्रवाशांनी संताप व्यक्त करत घोषणाबाजीही केली.

दुर्गम व डोंगराळ गावातील विद्यार्थी व नागरिकांसाठी उपयुक्त कऱ्हाड-ढेबेवाडी-जिंती मार्गावरील एसटीतील अनियमितता दूर करण्याची मागणी वारंवार करण्यात येत असली तरी त्याकडे फारशा गांभीर्याने पाहिले जात नव्हते. त्यामुळे प्रवाशांतून संताप व्यक्त होत आहे. अचानक फेरी रद्द केल्यावर प्रवाशांचे मोठे हाल होते.

भोसगाव, मराठवाडी, उमरकांचन, सावंतवाडी, कोळेकरवाडी, जिंती व त्या परिसरातील अनेक वाड्या-वस्त्यांच्या दळणवळणासाठी ढेबेवाडी-जिंती मार्गावरील बससेवेचा आधार आहे. एसटी सेवेत नियमितता नसल्याने बाहेरगावी शिक्षणास जाणारे विद्यार्थी, नागरिक, उपचारासाठी दवाखान्यात जाणारे रुग्ण, नोकरदार आदींना अनेक अडचणींना सामोरे जावे लागत आहे. जिंती खोऱ्यातील विविध दुर्गम वाड्या-वस्त्यांतून आठवडा बाजारासाठी आलेल्या नागरिकांचा बस स्थानकात पुन्हा संतापाचा उद्रेक झाला.

स्थानकात उभ्या अन्य एसटी बसमध्ये बसून वाहतूक रोखून धरण्याचाही त्यांनी प्रयत्न केला. पोलिसांनी धाव घेऊन प्रवाशांना समजावण्याचा प्रयत्नही केला. एसटीच्या आधिकाऱ्यांशीही त्यांनी चर्चा केली. मात्र, प्रवासी ऐकण्याच्या मनस्थितीत नव्हते. यावेळी बोलताना रमेश पाटील, बापूराव पाटील, डी. जी. मोहिते, युवराज पाटील, कांता पाटील, सोनाबाई मणेकर, सुलाबाई पवार आदी प्रवासी उपस्थित होते.