शेतकऱ्यांची हाक... कुणी भाजी घेता का भाजी!

ढेबेवाडी (जि. सातारा) : लॉकडाउनमुळे बंद असलेले आठवडा बाजार, स्थानिक यंत्रणा व पोलिसांकडून दुकाने लावण्यास होणारा विरोध, विक्री व काढणीविना भाजीपाला शेतातच पडून राहिला आहे. भाजीपाला आणि मोठ्या बाजारपेठांत शेतमाल पाठविण्यात अडचणी येत असल्याने वर्दळीच्या रस्त्यावर जीव धोक्‍यात घालून भाजीपाला विक्रीची वेळ अनेक शेतकरी कुटुंबीयांवर आल्याचे चित्र ढेबेवाडी-कऱ्हाड मार्गावर ठिकठिकाणी दृष्टीस पडत आहे. 

ढेबेवाडी खोऱ्याला लपेटून दक्षिण-उत्तर वाहणारी वांग नदी महिंद, मराठवाडी, साखरी धरणाचे पाणी उपलब्ध झाल्याने आता बारमाही वाहायला लागली आहे. पाणीपुरवठ्याची शाश्‍वती आल्याने विभागात ओघानेच बागायती क्षेत्रही वाढले असून उसाबरोबरच भाजीपाला आणि फळपिकांचे उत्पादनही शेतकरी घेत आहेत. आतापर्यंत शेतकरी स्थानिक आठवडा बाजार, नियमित भरणाऱ्या मंडईबरोबरच कऱ्हाड व मुंबईला भाजीपाला विक्रीस पाठवायचे. मात्र, मार्चमध्ये लॉकडाउन जाहीर झाल्यापासून त्यांचे भाजीपाला विक्रीचे गणितच विस्कटले आहे. मोठ्या कष्टाने पिकविलेला भाजीपाला यंत्रणेचा डोळा चुकवून विकण्याची वेळ शेतकऱ्यांवर आली आहे. काही जण दुचाकीवरून गावोगावी फिरून भाजीपाला विक्री करत असले तरी सर्वच शेतकऱ्यांना हे शक्‍य होत नाही. बहुतांश शेतकऱ्यांना नेहमीच्या जागेवर बसून भाजीविक्री करण्यास विरोध होत असल्याने ते वर्दळीच्या रस्त्यावर बसून भाजीपाला विकत असल्याचे चित्र कऱ्हाड-ढेबेवाडी रस्त्यावर ठिकठिकाणी दृष्टीस पडत आहे. या मार्गाचे चौपदरीकरण झाल्याने रात्रंदिवस वाहनांची वर्दळ असते. अनेक शेतकरी साइडपट्ट्यावर बैठक मारून भाजीविक्रीस बसत असल्याने अपघाताची भीती वाढली आहे. 

...तर सुरक्षिततेसह दिलासाही मिळेल 
रस्त्याकडेला विक्रीस मांडलेल्या विविध प्रकारच्या ताज्या पालेभाज्या खरेदीसाठी वाहनचालक अचानक ब्रेक लावून रस्त्यावर वाहने थांबवत असल्याने पाठीमागून येणाऱ्या वाहनचालकांचा गोंधळ उडत आहे. खरेदीसाठी रस्त्यावर होणारी गर्दीही अपघातांना निमंत्रण देणारी ठरत आहे. सोशल डिस्टन्सिंग, मास्क आदी दक्षता पाळत संबंधित गावांजवळ योग्य ठिकाणी भाजीपाला विक्रीची व्यवस्था केल्यास त्या-त्या गावातील शेतकऱ्यांना सुरक्षिततेबरोबरच दिलासाही मिळू शकेल. 

(संपादन ः संजय साळुंखे) 
 

अरे व्वा! या हॉस्पिटलचे कोरोनामुक्तीचे त्रिशतक