Satara Assembly Election 2024 : सातारा-जावळीत ६३.५२ टक्के मतदान; सकाळी केंद्रावर गर्दी

सातारा : सातारा जावळी विधानसभा मतदारसंघात बुधवारी शांततेत मतदान प्रक्रिया पार पडली. सायंकाळी पाचपर्यंत याठिकाणी झालेल्‍या एकत्रित मतदानाची टक्केवारी ६३.५२ टक्के इतकी असल्‍याची माहिती निवडणूक यंत्रणेकडून देण्‍यात आली.

याठिकाणच्‍या निवडणुकीसाठी महायुतीच्‍या वतीने भाजपकडून आमदार शिवेंद्रसिंहराजे भोसले, तर महाविकास आघाडीच्‍या वतीने शिवसेना उद्धव बाळासाहेब ठाकरे पक्षाकडून अमित कदम यांना उमेदवारी देण्‍यात आली होती. त्‍यांच्‍याव्‍यतिरिक्‍त अपक्ष, वंचित बहुजन आघाडीचे उमेदवार देखील या निवडणुकीच्‍या रिंगणात होते.

यामुळे याठिकाणच्‍या निवडणुकीत रंगत निर्माण झाली होती. प्रचाराच्‍या तोफा थंडावल्‍यानंतर बुधवारी येथील निवडणुकीसाठी प्रत्‍यक्ष मतदान झाले. सकाळच्‍या सत्रात खासदार उदयनराजे भोसले, दमयंतीराजे भोसले, राजमाता कल्‍पनाराजे भोसले यांनी अनंत इंग्‍लिश स्कूलमधील केंद्रावर जात मतदान केले.

याचदरम्‍यान आमदार शिवेंद्रसिंहराजे भोसले, वेदांतिकाराजे भोसले, ऋणालीराजे, रुद्रनिलराजे यांनी क्रांती स्‍मृती येथील मतदान केंद्रात मतदानाचा हक्क बजावला. कास येथील मतदान केंद्रात अमित कदम यांनी सपत्‍निक मतदान केले.

सकाळच्‍या सत्रात शहरासह परिसरातील जावळीतील मतदान केंद्रांवर मतदारांची गर्दी होती. यानंतर दुपारच्‍या सत्रात मतदारांची संख्‍या रोडावली. दुपारी तीननंतर पुन्‍हा एकदा मतदान केंद्रांवर मतदारांची मोठी गर्दी होण्‍यास सुरुवात झाली. ज्‍येष्‍ठ तसेच दिव्‍यांग मतदारांना मतदान केंद्रात नेण्‍यासाठी या वेळी केंद्राबाहेरील स्‍वयंसेवकांची दिवसभर धावपळ सुरू होती.

सायंकाळी सहा वाजल्‍यानंतर केंद्रात असणाऱ्या मतदारांना टोकन देत केंद्रांची प्रवेशद्वारे बंद करण्‍यात आली. सायंकाळी पाचपर्यंत सातारा- जावळी विधानसभा मतदारसंघात ६३.५२ टक्के इतके मतदान झाले.

दिवसभरात कोठेही कोणताही अनुचित प्रकार घडू नये, यासाठी पोलिस, विशेष सुरक्षा पथकाचे जवान कार्यरत होते.

#ElectionWithSakal