सातारा : व्याघ्र प्रकल्पाच्या चुकीच्या धोरणाविरोधात उपोषण सुरू

कोयनानगर : कोयना प्रकल्पासाठी संपादित केलेल्या जमिनीच्या मोबदल्यात तेथून जवळच मिळालेले जमीन क्षेत्र सह्याद्री व्याघ्र प्रकल्पाच्या कोअर झोनमध्ये अडकले आहे. त्या जमिनीचा मोबदला मिळावा, यासाठी खासगी वाटाघाटीने थेट खरेदी पद्धतीने विकत घ्यायच्या जमिनीचा मोबदला निश्चित करून त्यास जिल्हाधिकारी यांनी मान्यता दिली, तरीही वन्यजीव विभागाचे वरिष्ठ अधिकारी जाणीवपूर्वक विलंब करत असल्याने गत दहा वर्षांपासून मूत्रपिंड निकामी झाल्यामुळे त्रस्त असलेल्या हुंबरळी येथील बाधित देसाई कुटुंबीय यांनी कोयनानगर येथील वन्यजीव कार्यालयासमोर आमरण उपोषण सुरू केले आहे.

याबाबत वन्यजीव विभागाचे सहायक वनसंरक्षक सुरेश साळुंखे यांच्याशी संपर्क साधला असता महसूल विभागाकडून या जमिनीचे वाटप झाले असले, तरी त्या काळात त्या जमिनीचे निर्वाणीकरण झालेले नाही. आजही त्या जमिनीचा दर्जा वन राखीव म्हणून आहे. ही जमीन वन विभागाची आहे. ही तांत्रिक चूक आहे. वन विभागाची जागा वन विभाग कशी विकत घेणार, असा प्रश्न त्यांनी या वेळी उपस्थित केला.