कुमठ्यात एकाच दिवसात मिनी कोरोना केअर सेंटर सुरू
कोरेगाव (जि. सातारा) : कुमठे (ता. कोरेगाव) ग्रामपंचायतीने गावातील रुग्णांसाठी चार बेडचे मिनी कोरोना केअर सेंटर उभारले आहे. कुमठ्याचे सुपुत्र व पंचायत समितीचे सभापती राजाभाऊ जगदाळे यांच्या संकल्पनेतून "माझे कुटुंब, माझी जबाबदारी' या मोहिमेंतर्गत एकाच दिवसात ग्रामपंचायतीने चार ऑक्‍सिजन यंत्रणेसह रुग्णांसाठी स्वतंत्र चार बेड, कर्मचाऱ्यांसाठी पीपीई किट, तपासणी उपकरणे खरेदी करून गावातील मुरलीधर मंदिरात हे सेंटर उभे केले आहे.
ऑक्‍सिजन वाचून गावातील काही नागरिकांचा बळी गेला आहे, त्यातूनच केअर सेंटर उभारण्याचा निर्णय सरपंच रत्नमाला क्षीरसागर, उपसरपंच जितेंद्र जगदाळे व त्यांच्या सहकारी सदस्यांनी घेतला. त्यासाठी सभापती जगदाळे यांनी मदत दिली. तालुका आरोग्य अधिकारी डॉ. राजेंद्र जाधव, तडवळे आरोग्य केंद्राचे डॉ. सागर वाघमारे, डॉ. राजीव अरलुरकर, डॉ. नितीन जाधव यांनी सेंटरसाठी मार्गदर्शन केले.
गावातील नागरिकांना इतरत्र रुग्णालयांमध्ये बेड उपलब्ध होईपर्यंत त्यांना गावातच विनामोबदला ऑक्‍सिजन, प्राथमिक औषधोपचार, वाफरा अशा सुविधा मिळणार असून, महत्त्वाचे म्हणजे तज्ज्ञ डॉक्‍टरांच्या माध्यमातून रुग्णांच्या मनातील भीती, गैरसमज दूर करण्याचा प्रयत्नही केला जाणार आहे. या सेंटरचे लोकार्पण सरपंच क्षीरसागर यांच्या हस्ते झाले. या वेळी प्रा. जितेंद्र जगदाळे, ग्रामविकास अधिकारी आबासाहेब बर्गे, उपसरपंच जितेंद्र जगदाळे, ग्रामपंचायत सदस्य, पोलिस पाटील जयवंत जगदाळे, राजेंद्र जवळेकर, सरला जवळेकर, उज्ज्वला अरलुलकर, तसेच आरोग्य विभागाचे कर्मचारी व ग्रामस्थ उपस्थित होते.
अरलूलकर कुटुंबीयांकडून जागा
कुमठे गावातील ज्येष्ठ समाजसेवक, आचार्य विनोबा भावे यांचे अनुयायी (कै.) श्रीधर सखाराम अरलूलकर ऊर्फ मास्तर मामा यांच्या वार्षिक कृतज्ञता दिनानिमित्त अरलूलकर कुटुंबीयांनी कोरोना केअर सेंटरसाठी श्री मुरलीधर मंडप येथे जागा उपलब्ध करून दिल्याबद्दल डॉ. राजीव अरलूलकर यांच्यासह अरलूलकर कुटुंबीयांचे आभार मानत सभापती जगदाळे यांनी आगामी काळात श्रीधर अरलूलकर यांच्या नावाने कृषी पुरस्कार सुरू करण्यासाठी प्रयत्न करण्याची ग्वाही याप्रसंगी दिली.
संपादन : पांडुरंग बर्गे
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.