तारळे विभागात लालपरीअभावी प्रवाशांची गैरसोय; नोकरदार, विद्यार्थ्यांना मोठा फटका

तारळे (जि. सातारा) : "मिशन बिगीन' अंतर्गत नववी ते बारावी वर्ग सुरू झाले आहेत. आठवडा बाजार, सर्व उद्योगधंदेही खुले झालेत. या पार्श्वभूमीवर विभागातील एसटीच्या फेऱ्या पूर्ववत झाल्या. मात्र, विभागातील लालपरीच्या मुक्कामी फेऱ्या सुरू न झाल्याने कष्टकरी, नोकरदार, विद्यार्थ्यांची गैरसोय होत आहे. त्याकडे अधिकारी डोळेझाक करीत असून विभागातील पूर्वीच्या मुक्कामी फेऱ्या सुरू करण्याची मागणी प्रवाशांकडून होऊ लागली आहे. 

कोरोनाच्या पार्श्वभूमीवर बंद असलेले सर्व व्यवहार खुले झाले आहेत. शेवटच्या टप्प्यात शाळा, कॉलेजही सुरू झालेत. सध्या कोरोना आटोक्‍यात आहे. सोशल डिस्टन्स, मास्क, सॅनिटायझर आदींचा वापर करून बाजारपेठा सुरू झाल्या, त्याच धर्तीवर विविध गावचे ठप्प झालेले आठवडी बाजारही सुरू झाले आहेत. त्यातच जनमाणसातील भीती कमालीची कमी झाली आहे. जनजीवन आता कुठेसे पूर्वपदावर येऊ लागले आहे. मात्र, दळणवळणची समस्या बनली होती. त्याचा आठवडा बाजारावर परिणाम होत होता. लोकांना इच्छा असून वाहनांअभावी बाजारासह कामांना बाहेर पडता येत नव्हते.

वैरत्व संपवून अनेक गावांत काका-बाबा गट एकत्र; कऱ्हाड दक्षिणेत दिसणार मनोमिलनाचा करिष्मा  

विभागात सातारा, पाटण व कऱ्हाड, नागठाणे, उंब्रज आदी ठिकाणी नियमित फेऱ्या होत नव्हत्या. त्यावर 15 दिवसांपूर्वी "तारळे विभागाला लालपरीची प्रतीक्षा' या आशयाखाली दै. "सकाळ'मध्ये वृत्त प्रकाशित झाले होते. त्यानंतर गत आठवड्यात सर्व ठिकाणच्या फेऱ्या नियमित झाल्या आहेत. मात्र, भागातील पूर्वीच्या मुक्कामी फेऱ्यांची अजूनही प्रतीक्षाच आहे. त्यामुळे अधिकाऱ्यांनी गंभीर्याने विचार करून प्रवाशांना दिलासा द्यावा, अशी मागणी होत आहे. मुक्कामी नसणाऱ्या बसफेऱ्यांमुळे सकाळी लवकर कामासाठी बाहेर पडणे व रात्री घरी येण्यासाठी लोकांना अडचणींना तोंड द्यावे लागत आहे. शाळा, कॉलेजला जाणाऱ्या विद्यार्थ्यांनाही फटका बसत आहे. मुरुड, जुगाईवाडी, पाबळवाडी, जळव, दुसाळे, कडवे आदी मुक्कामी फेऱ्या पूर्ववत कराव्यात, या मागणीने जोर धरला आहे. 

संपादन : बाळकृष्ण मधाळे