भाजपकडून शेतकरी आंदोलन दडपण्याचा प्रयत्न; मोदी सरकारविरोधात रिपाइं आक्रमक

सातारा : दिल्ली येथे सुरू असणारे शेतकरी आंदोलन दडपण्याचा प्रयत्न केल्याबद्दल तसेच गॅस, डिझेल, पेट्रोल दरवाढीच्या निषेधार्थ आज येथे रिपब्लिकन पक्षाच्या वतीने जिल्हाधिकारी कार्यालयासमोर आंदोलन करण्यात आले. याबाबतचे निवेदन आंदोलकांनी जिल्हाधिकारी कार्यालयास दिले आहे. 

निवेदनात कृषी कायदे मागे घेण्यासाठीच्या मागणीसाठी राजस्थान, पंजाब, हरियाना, उत्तर प्रदेशमधील शेतकरी दिल्ली येथे आंदोलन करत आहेत. हे आंदोलन केंद्र सरकार बळाचा वापर करून दडपण्याचा प्रयत्न करत आहे. केंद्र सरकार लोकशाहीची पायमल्ली करत असल्याचा आरोप करण्यात आला आहे.

मी इथं बरा आहे शिवेंद्रसिंहराजे; बाळासाहेबांच्या विनंतीवर फलटणच्या राजेंनी केले ग्रेड सेपरेटरचे उद्‌घाटन  

याचबराबेर केंद्र शासन गॅस, डिझेल, पेट्रोलचे भाव दररोज वाढवत आहे. या भाववाढीमुळे सर्वसामान्यांचे आर्थिक गणित बिघडले आहे. ही भाववाढ मागे घेण्याची मागणीही निवेदनात करण्यात आली आहे. या आंदोलनात दादासाहेब ओव्हाळ, मदन खंकाळ, किरण ओव्हाळ, किरण बगाडे, विक्रम वाघमारे, अशोक जाधव, सुनील गाडे, किरण गाडे, सोमनाथ धोत्रे आदी सहभागी झाले होते. 

संपादन : बाळकृष्ण मधाळे